ನವದೆಹಲಿ: Tulu Times l ಭಾರತೀಯ ಕುಸ್ತಿ ಫೆಡರೇಶನ್ 2026ರ ಏಷ್ಯನ್ ಗೇಮ್ಸ್ ಆಯ್ಕೆ ಟ್ರಯಲ್ಸ್ನಲ್ಲಿ ಪಾಲ್ಗೊಳ್ಳಲು ಅವಕಾಶ ನೀಡಿದ ವಿನೇಶ್ ಫೋಗಟ್ ಪರದ ದೆಹಲಿ ಹೈಕೋರ್ಟ್ ಆದೇಶವನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್ಗೆ ಮೊರೆ ಹೋಗಿದೆ. ಮೇ 22ರಂದು ದೆಹಲಿ ಹೈಕೋರ್ಟ್ ವಿಭಾಗೀಯ ಪೀಠ ನೀಡಿದ್ದ ಆದೇಶದ ಮೇರೆಗೆ ಫೆಡರೇಶನ್ ತನ್ನ ವಿಶೇಷ ಅನುಮತಿ ಅರ್ಜಿಯಲ್ಲಿ (SLP) ವಾದಿಸಿದೆ. ವಿನೇಶ್ ಪರ ಆದೇಶ ನೀಡುವ ಮೊದಲು ಫೆಡರೇಶನ್ಗೆ ಸಮಗ್ರ ಉತ್ತರ ಸಲ್ಲಿಸಲು ಸಮರ್ಪಕ ಅವಕಾಶ ನೀಡಲಿಲ್ಲ ಎಂದು ಡಬ್ಲ್ಯುಎಫ್ಐ ಆರೋಪಿಸಿದೆ. ಅಲ್ಲದೆ, ಪ್ರಕಟಿತ ಆಯ್ಕೆ ಮಾನದಂಡಗಳ ಪ್ರಕಾರ ವಿನೇಶ್ ಅರ್ಹರಲ್ಲದಿದ್ದರೂ, ಐಚಿ-ನಗೋಯಾದಲ್ಲಿ ನಡೆಯಲಿರುವ ಏಷ್ಯನ್ ಗೇಮ್ಸ್ಗಾಗಿ ದೆಹಲಿಯಲ್ಲಿ ಶನಿವಾರ ನಡೆಯುವ ಟ್ರಯಲ್ಸ್ಗೆ ಅವರನ್ನು ಸೇರಿಸಲು ಹೈಕೋರ್ಟ್ ಸೂಚಿಸಿದೆ ಎಂದು ಫೆಡರೇಶನ್ ಹೇಳಿದೆ.
2024ರ ಡಿಸೆಂಬರ್ನಲ್ಲಿ ಕುಸ್ತಿಯಿಂದ ಸ್ವಯಂ ನಿವೃತ್ತಿ ;
ಅಂತರರಾಷ್ಟ್ರೀಯ ಕ್ರೀಡಾಕೂಟಗಳಿಗೆ ಆಟಗಾರರ ಆಯ್ಕೆ ಮಾಡುವುದು ಮಾನ್ಯತೆ ಪಡೆದ ರಾಷ್ಟ್ರೀಯ ಕ್ರೀಡಾ ಫೆಡರೇಶನ್ ವ್ಯಾಪ್ತಿಗೆ ಮಾತ್ರ ಸೇರಿದ್ದು, ನ್ಯಾಯಾಂಗದ ಹಸ್ತಕ್ಷೇಪ ಕ್ರೀಡಾ ಆಯ್ಕೆ ವ್ಯವಸ್ಥೆಯ ಮೇಲೆ ಪರಿಣಾಮ ಬೀರುತ್ತದೆ ಎಂದು ಡಬ್ಲ್ಯುಎಫ್ಐ ವಾದಿಸಿದೆ. ಈ ವಿವಾದದ ಹಿನ್ನೆಲೆಯನ್ನು ವಿವರಿಸಿದ ಫೆಡರೇಶನ್, ವಿನೇಶ್ ಫೋಗಟ್ ಅವರು 2024ರ ಡಿಸೆಂಬರ್ನಲ್ಲಿ ಕುಸ್ತಿಯಿಂದ ಸ್ವಯಂ ನಿವೃತ್ತಿ ಘೋಷಿಸಿ, ಅದನ್ನು ಅಂತಾರಾಷ್ಟ್ರೀಯ ಟೆಸ್ಟಿಂಗ್ ಏಜೆನ್ಸಿಗೆ ಅಧಿಕೃತವಾಗಿ ತಿಳಿಸಿದ್ದರು ಎಂದು ಹೇಳಿದೆ. ವಿಶ್ವ ಕುಸ್ತಿ ಸಂಸ್ಥೆ ಹಾಗೂ WADA ನಿಯಮಾವಳಿಗಳ ಪ್ರಕಾರ ನಿವೃತ್ತಿಯಿಂದ ಮರಳುವ ಆಟಗಾರರು ಕನಿಷ್ಠ ಆರು ತಿಂಗಳ ‘ವೇರ್ಅಬೌಟ್ಸ್’ ಮತ್ತು ಡೋಪ್ ಪರೀಕ್ಷಾ ಅವಧಿಯನ್ನು ಕಡ್ಡಾಯವಾಗಿ ಪೂರ್ಣಗೊಳಿಸಬೇಕಾಗುತ್ತದೆ ಎಂದು ಅರ್ಜಿಯಲ್ಲಿ ಉಲ್ಲೇಖಿಸಲಾಗಿದೆ. ಇದಲ್ಲದೆ, 2025ರ ಡಿಸೆಂಬರ್ 18ರಂದು ನಡೆದ ಪರೀಕ್ಷಾ ಪ್ರಯತ್ನ ವಿಫಲವಾದ ಹಿನ್ನೆಲೆಯಲ್ಲಿ ಮೇ 4ರಂದು ವಿನೇಶ್ ವಿರುದ್ಧ, ಮಿಸ್ಡ್ ಟೆಸ್ಟ್ ದಾಖಲಾಗಿದ್ದು, ಮೇ 9ರಂದು ಶೋಕಾಸ್ ನೋಟಿಸ್ ನೀಡಲಾಗಿದೆ ಎಂದು ಫೆಡರೇಶನ್ ಹೇಳಿದೆ.
ಶೋಕಾಸ್ ನೋಟಿಸ್ ಜಾರಿ ;
ವಿನೇಶ್ ವಿರುದ್ಧದ ಶಿಸ್ತು ಕ್ರಮ ಇನ್ನೂ ಬಾಕಿಯಿದ್ದು, ಅದು ಪೂರ್ಣಗೊಳ್ಳುವವರೆಗೆ ಪ್ರಕ್ರಿಯೆಗೆ ಅವಕಾಶ ನೀಡಬೇಕು ಎಂದು ಡಬ್ಲ್ಯುಎಫ್ಐ ಕೋರಿದೆ. 2026ರ ಫೆಬ್ರವರಿಯಲ್ಲಿ ಪ್ರಕಟಿಸಿದ ಆಯ್ಕೆ ನೀತಿಯಲ್ಲಿ, ಐಕಾನಿಕ್ ಪ್ಲೇಯರ್ ಅಥವಾ ಮಾತೃತ್ವ ಆಧಾರಿತ ವಿನಾಯಿತಿ ಎಂಬ ಯಾವುದೇ ವ್ಯವಸ್ಥೆ ಇಲ್ಲ ಎಂದು ಫೆಡರೇಶನ್ ಸ್ಪಷ್ಟಪಡಿಸಿದೆ. ಆಯ್ಕೆ ಪ್ರಕ್ರಿಯೆ ಸದಾ ಪ್ರತಿಭೆ ಮತ್ತು ಸಾಧನೆ ಆಧಾರಿತವಾಗಿಯೇ ನಡೆದಿದೆ ಎಂದು ಹೇಳಿದೆ. ಏಷ್ಯನ್ ಗೇಮ್ಸ್ ಮಾನ್ಯತಾ ಪ್ರಕ್ರಿಯೆಯ ಅಂತಿಮ ದಿನಾಂಕ ಮೇ 14ರಂದೇ ಮುಗಿದಿರುವುದರಿಂದ, ಹೈಕೋರ್ಟ್ ಆದೇಶ ಜಾರಿಗೊಳಿಸುವುದು ಕಷ್ಟಕರವಾಗಿದೆ ಎಂದೂ ಫೆಡರೇಶನ್ ಹೇಳಿದೆ. ಇನ್ನು, ರಾಷ್ಟ್ರೀಯ ಓಪನ್ ರ್ಯಾಂಕಿಂಗ್ ಸ್ಪರ್ಧೆಯಲ್ಲಿ ಭಾಗವಹಿಸಲು ಅವಕಾಶ ನಿರಾಕರಿಸಿದ ಬಳಿಕ ವಿನೇಶ್ ಫೋಗಟ್ ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿದ್ದರು. ಆರಂಭದಲ್ಲಿ ಅವರಿಗೆ ಪರಿಹಾರ ಸಿಗದಿದ್ದರೂ, ಮೇಲ್ಮನವಿ ಬಳಿಕ ಹೈಕೋರ್ಟ್ ಮೇ 30ರಂದು ನಡೆಯುವ ಟ್ರಯಲ್ಸ್ನಲ್ಲಿ ಪಾಲ್ಗೊಳ್ಳಲು ಅವಕಾಶ ನೀಡಿತ್ತು. ನಿಯಮ ಉಲ್ಲಂಘನೆ ಆರೋಪದಡಿ ಡಬ್ಲ್ಯುಎಫ್ಐ ವಿನೇಶ್ ಅವರಿಗೆ ಈಗಾಗಲೇ ಶೋಕಾಸ್ ನೋಟಿಸ್ ಜಾರಿ ಮಾಡಿದೆ.
Vinesh Phogat controversy: Wrestling Federation moves Supreme Court alleging judicial interference – ತುಳು ಟೈಮ್ಸ್
ಇದನ್ನೂ ಓದಿ :ಪ್ರಾಮಾಣಿಕವಾಗಿ ಕರ್ನಾಟಕಕ್ಕೆ ಸೇವೆ ಸಲ್ಲಿಸಿದ್ದೇನೆ, ಯಾವುದೇ ಒತ್ತಡದಿಂದ ರಾಜೀನಾಮೆ ನೀಡಿಲ್ಲ: ಸಿದ್ದರಾಮಯ್ಯ
======
ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ :https://www.youtube.com/live/EYKaZkoL8Qk?si=0kWbf0EJ9nWCRuOY
