ಕರ್ನಾಟಕದಲ್ಲಿ ಬರ್ಡ್ ಫ್ಲೂ ಆತಂಕವನ್ನು ಯಶಸ್ವಿಯಾಗಿ ನಿಭಾಯಿಸಿದ ಸರ್ಕಾರ

ಕರ್ನಾಟಕ : Tulu Times l ಕರ್ನಾಟಕದಲ್ಲಿ ಪತ್ತೆಯಾಗಿದ್ದ ಬರ್ಡ್ ಫ್ಲೂ ಸೋಂಕಿನ ಆತಂಕವನ್ನು ರಾಜ್ಯ ಸರ್ಕಾರ ತ್ವರಿತ ಕ್ರಮಗಳ ಮೂಲಕ ಯಶಸ್ವಿಯಾಗಿ ನಿಯಂತ್ರಿಸಿದೆ. ಹೇಸರಘಟ್ಟ ಸಮೀಪದ ಮಠ್ಕೂರು ಗ್ರಾಮದ ರಾಜ್ಯ ಕೋಳಿ ಸಾಕಾಣಿಕೆ ತರಬೇತಿ ಕೇಂದ್ರದಲ್ಲಿ ಹೆಚ್ 5 ಎನ್ 1 ಏವಿಯನ್ ಇನ್‌ಫ್ಲುಯೆನ್ಸಾ ಸೋಂಕು ದೃಢಪಟ್ಟ ಬಳಿಕ ಕೈಗೊಂಡಿದ್ದ 10 ದಿನಗಳ ತೀವ್ರ ನಿಗಾವಳಿ ಹಾಗೂ ನಿಯಂತ್ರಣ ಕಾರ್ಯಾಚರಣೆ ಇದೀಗ ಪೂರ್ಣಗೊಂಡಿದೆ.

ಏಪ್ರಿಲ್ 14ರಂದು ಸೋಂಕು ಪತ್ತೆಯಾದ ತಕ್ಷಣ ಆರೋಗ್ಯ ಇಲಾಖೆ, ಪಶುಸಂಗೋಪನೆ ಇಲಾಖೆ ಹಾಗೂ ಸ್ಥಳೀಯ ಆಡಳಿತ ಯಂತ್ರ ಚುರುಕುಗೊಂಡಿತು. ಸೋಂಕು ಹರಡುವುದನ್ನು ತಡೆಯಲು ಸಂಬಂಧಿತ ಪ್ರದೇಶವನ್ನು ತಕ್ಷಣ ಸೀಲ್ ಮಾಡಿ, ತುರ್ತು ಪ್ರತಿಕ್ರಿಯಾ ತಂಡಗಳನ್ನು ನಿಯೋಜಿಸಲಾಯಿತು. ಸೋಂಕಿತ ಕೇಂದ್ರದ ಸುತ್ತಮುತ್ತ 3 ಕಿಲೋಮೀಟರ್ ವ್ಯಾಪ್ತಿಯನ್ನು ಸೋಂಕು ವಲಯವೆಂದು ಘೋಷಿಸಿದರೆ, 10 ಕಿಲೋಮೀಟರ್ ವ್ಯಾಪ್ತಿಯನ್ನು ನಿಗಾವಳಿ ವಲಯವೆಂದು ಗುರುತಿಸಲಾಯಿತು.

ಸೋಂಕಿತ ಪ್ರದೇಶದಲ್ಲಿದ್ದ ಎಲ್ಲಾ ಕೋಳಿಗಳನ್ನು ಮಾನದಂಡದಂತೆ ವಿಲೇವಾರಿ ಮಾಡಲಾಯಿತು. ಮೊಟ್ಟೆಗಳು, ಆಹಾರ ಸಾಮಗ್ರಿಗಳು ಮತ್ತು ಕಲುಷಿತ ವಸ್ತುಗಳನ್ನು ಸಹ ಸುರಕ್ಷಿತವಾಗಿ ನಾಶಪಡಿಸಲಾಯಿತು. ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಜೈವಿಕ ಭದ್ರತಾ ನಿಯಮಗಳನ್ನು ಪಾಲಿಸಿ ಈ ಕಾರ್ಯ ನಡೆದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಅವಧಿಯಲ್ಲಿ 22 ಗ್ರಾಮಗಳ 28 ಸಾವಿರಕ್ಕೂ ಹೆಚ್ಚು ಜನರನ್ನು ಆರೋಗ್ಯ ತಪಾಸಣೆಗೆ ಒಳಪಡಿಸಲಾಯಿತು. ಹಲವು ಸುತ್ತಿನ ಮನೆಮನೆ ಸಮೀಕ್ಷೆ, ಸ್ವಚ್ಛತಾ ಕಾರ್ಯ ಮತ್ತು ಆರೋಗ್ಯ ಜಾಗೃತಿ ಕಾರ್ಯಕ್ರಮಗಳು ನಡೆದವು. ಕ್ವಾರಂಟೈನ್‌ನಲ್ಲಿದ್ದ ಸಿಬ್ಬಂದಿಯಿಂದ ಸಂಗ್ರಹಿಸಿದ ಮಾದರಿಗಳ ಪರೀಕ್ಷೆಯಲ್ಲಿಯೂ ಸೋಂಕು ದೃಢಪಟ್ಟಿಲ್ಲ.

ಇಲ್ಲಿಯವರೆಗೆ ಯಾವುದೇ ಮಾನವನಲ್ಲಿ H5N1 ಸೋಂಕು ಪತ್ತೆಯಾಗಿಲ್ಲ ಎಂಬುದು ಜನತೆಗೆ ದೊಡ್ಡ ನೆಮ್ಮದಿ ನೀಡಿದೆ. ಆದರೂ ಮುನ್ನೆಚ್ಚರಿಕೆ ಕ್ರಮವಾಗಿ ಬೆಂಗಳೂರಿನ ಎಲ್ಲಾ ಆಸ್ಪತ್ರೆಗಳಿಗೆ ಜ್ವರ, ಉಸಿರಾಟ ತೊಂದರೆ ಪ್ರಕರಣಗಳ ಮೇಲೆ ವಿಶೇಷ ನಿಗಾವಹಿಸಲು ಸೂಚಿಸಲಾಗಿದೆ. ಜೊತೆಗೆ PPE ಕಿಟ್, ಮಾಸ್ಕ್‌, ಔಷಧಿ ಮತ್ತು ಪರೀಕ್ಷಾ ಸಾಮಗ್ರಿಗಳ ಸಂಗ್ರಹ ಕಡ್ಡಾಯಗೊಳಿಸಲಾಗಿದೆ. ಇನ್ನೂ 90 ದಿನಗಳ ಕಾಲ ಸೋಂಕು ಪತ್ತೆಯಾದ ಪ್ರದೇಶದಲ್ಲಿ ಯಾವುದೇ ಕೋಳಿ ಸಾಕಾಣಿಕೆ ಚಟುವಟಿಕೆಗಳಿಗೆ ಅವಕಾಶ ಇರುವುದಿಲ್ಲ. ಪ್ರತಿ 15 ದಿನಕ್ಕೊಮ್ಮೆ ಪ್ರದೇಶವನ್ನು ಸ್ಯಾನಿಟೈಸ್ ಮಾಡುವ ಕಾರ್ಯ ಮುಂದುವರಿಯಲಿದೆ.

ಜನರು ಅಸ್ವಸ್ಥ ಅಥವಾ ಸತ್ತ ಪಕ್ಷಿಗಳನ್ನು ಮುಟ್ಟಬಾರದು, ಮಾಂಸ ಮತ್ತು ಮೊಟ್ಟೆಯನ್ನು ಚೆನ್ನಾಗಿ ಬೇಯಿಸಿ ಮಾತ್ರ ಸೇವಿಸಬೇಕು ಹಾಗೂ ಯಾವುದೇ ಅನುಮಾನಾಸ್ಪದ ಘಟನೆ ಕಂಡುಬಂದರೆ ತಕ್ಷಣ ಅಧಿಕಾರಿಗಳಿಗೆ ಮಾಹಿತಿ ನೀಡಬೇಕು ಎಂದು ಸರ್ಕಾರ ಮನವಿ ಮಾಡಿದೆ. ಒಟ್ಟಾರೆ, ಬರ್ಡ್ ಫ್ಲೂ ಆತಂಕವನ್ನು ಸಮಯೋಚಿತ ಕ್ರಮಗಳಿಂದ ನಿಯಂತ್ರಿಸಿರುವುದು ಸರ್ಕಾರದ ಕಾರ್ಯಕ್ಷಮತೆಯ ಸಂಕೇತವಾಗಿದೆ. ಜನರು ಎಚ್ಚರಿಕೆಯಿಂದಿದ್ದರೆ ಈ ಸೋಂಕು ಮತ್ತಷ್ಟು ಹರಡುವ ಸಾಧ್ಯತೆ ಕಡಿಮೆಯಾಗುತ್ತದೆ.

Government successfully tackles bird flu scare in Karnataka – ತುಳುಟೈಮ್ಸ್

ಇದನ್ನೂ ಓದಿ :ವೈದ್ಯರ ಎಚ್ಚರಿಕೆ: 90% ಕ್ಯಾನ್ಸರ್‌ ನಿಮ್ಮ ಜೀವನಶೈಲಿಯೊಂದಿಗೆ ಸಂಬಂಧ

===

ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್  ಮಾಡಿ :https://www.youtube.com/live/EYKaZkoL8Qk?si=-IK5lR4_a3M22XTz