ಮಂಗಳೂರು : Tulu Times l ಅರಬ್ಬಿ ಸಮುದ್ರದಲ್ಲಿ ಮೀನುಗಾರಿಕೆಗೆ ತೆರಳಿದ್ದ ಮೀನುಗಾರರ ಬಲೆಗೆ ಅಪರೂಪದ ‘ಕ್ಯಾಟ್ ಶಾರ್ಕ್’ ಮೀನು ಸಿಲುಕಿದ ಘಟನೆ ಗಮನ ಸೆಳೆದಿದೆ. ಬಳಿಕ ಮೀನುಗಾರರು ಮಾನವೀಯತೆ ತೋರಿಸಿ ಆ ಅಪರೂಪದ ಮೀನನ್ನು ಸುರಕ್ಷಿತವಾಗಿ ಮತ್ತೆ ಸಮುದ್ರಕ್ಕೆ ಬಿಟ್ಟಿದ್ದು, ಅದರ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಸಾಮಾನ್ಯ ಆಳ ಸಮುದ್ರ ಮೀನುಗಾರಿಕಾ ಕಾರ್ಯಾಚರಣೆಯ ವೇಳೆ ದೊಡ್ಡ ಗಾತ್ರದ ವಿಚಿತ್ರ ಮೀನು ಬಲೆಗೆ ಸಿಲುಕಿತ್ತು. ಹತ್ತಿರದಿಂದ ಪರಿಶೀಲಿಸಿದಾಗ ಅದರ ವಿಶಿಷ್ಟ ರೂಪ ನೋಡಿ ಮೀನುಗಾರರು ಅದು ಅಪರೂಪದ ಕ್ಯಾಟ್ ಶಾರ್ಕ್ ಜಾತಿಯ ಮೀನು ಎಂದು ಗುರುತಿಸಿದರು. ಮೀನನ್ನು ಕೊಲ್ಲದೇ ಅಥವಾ ಮಾರಾಟಕ್ಕೆ ಕಳುಹಿಸದೇ, ಮೀನುಗಾರರು ಎಚ್ಚರಿಕೆಯಿಂದ ಬಲೆಯಿಂದ ಹೊರತೆಗೆದರು. ಬಳಿಕ ಕ್ರೇನ್ ಸಹಾಯದಿಂದ ನಿಧಾನವಾಗಿ ಮತ್ತೆ ಸಮುದ್ರಕ್ಕೆ ಇಳಿಸಿದರು. ಮೀನು ಸುರಕ್ಷಿತವಾಗಿ ಸಮುದ್ರದೊಳಗೆ ಈಜಿಕೊಂಡು ಹೋಗುವ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿದೆ.
ಮಂಗಳೂರಿನ ಮೀನುಗಾರ ಸಮುದಾಯದ ಮುಖಂಡರ ಪ್ರಕಾರ, ಈ ಘಟನೆ ಮಂಗಳೂರು ಬಂದರಿನಲ್ಲೇ ನಡೆದಿಲ್ಲ. ತಮಿಳುನಾಡಿನ ಮೀನುಗಾರರು ಸಮುದ್ರ ಮಧ್ಯದಲ್ಲಿ ಈ ಅಪರೂಪದ ಮೀನನ್ನು ರಕ್ಷಿಸಿದ್ದಿರಬಹುದು ಎಂದು ವರದಿಗಳು ತಿಳಿಸಿವೆ. ಕ್ಯಾಟ್ ಶಾರ್ಕ್ ಅಪರೂಪದ ಶಾರ್ಕ್ ಜಾತಿಗೆ ಸೇರಿದ ಮೀನು. ಇದನ್ನು ಸಾಮಾನ್ಯವಾಗಿ ಆಹಾರಕ್ಕಾಗಿ ಬಳಸುವುದಿಲ್ಲ. ಆದ್ದರಿಂದ ಮೀನುಗಾರರು ಅದನ್ನು ಮತ್ತೆ ಅದರ ನೈಸರ್ಗಿಕ ವಾಸಸ್ಥಳಕ್ಕೆ ಬಿಡಲು ನಿರ್ಧರಿಸಿದ್ದಾರೆ. ಈ ಮೀನಿನ ತೂಕ ಸುಮಾರು 600 ಕೆಜಿ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಹೇಳಲಾಗಿದ್ದರೂ, ಸ್ಥಳೀಯ ಮೀನುಗಾರರ ಅಂದಾಜಿನ ಪ್ರಕಾರ ಅದು ಸುಮಾರು 150ರಿಂದ 200 ಕೆಜಿ ತೂಕ ಇರಬಹುದು ಎಂದು ತಿಳಿದುಬಂದಿದೆ. ಕೆಂಪು ಮಿಶ್ರಿತ ಬಣ್ಣ, ಬೆಕ್ಕಿನ ಕಣ್ಣುಗಳಂತಿರುವ ಕಣ್ಣುಗಳು ಹಾಗೂ ಬೆಕ್ಕಿನ ದೇಹದಂತೆ ಕಾಣುವ ಪಟ್ಟೆಗಳಿರುವುದರಿಂದ ಇದಕ್ಕೆ ಕ್ಯಾಟ್ ಶಾರ್ಕ್ ಎಂಬ ಹೆಸರು ಬಂದಿದೆ ಎಂದು ಹೇಳಲಾಗುತ್ತದೆ. ಅದರ ವಿಶಿಷ್ಟ ಆಕಾರ ಮತ್ತು ಗಾತ್ರ ಜನರ ಕುತೂಹಲಕ್ಕೆ ಕಾರಣವಾಗಿದೆ.
Rare ‘cat shark’ rescued off Mangalore coast; Video goes viral – ತುಳು ಟೈಮ್ಸ್
ಇದನ್ನೂ ಓದಿ :ಹಾರ್ಮುಜ್ ಜಲಸಂಧಿ ಬಂದ್: ಜಾಗತಿಕ ತೈಲ ಬಿಕ್ಕಟ್ಟು ಮತ್ತು ‘ರೆಡ್ ಝೋನ್’ ಎಚ್ಚರಿಕೆ
=====
ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ :https://youtu.be/6UrejBf6Tw0?si=l1VNh7T8E7LgTtH5
