ವಿಜ್ಞಾನಿ : Tulu Times | ನಂದಿನಿ ಹರಿನಾಥ್ ಅವರು ಭಾರತದ ಐತಿಹಾಸಿಕ ಮಂಗಳಯಾನ ಯೋಜನೆಯ ವೇಳೆ ಧರಿಸಿದ್ದ ಸೀರೆ ಇದೀಗ ಅಮೆರಿಕದ ಪ್ರಸಿದ್ಧ ಸ್ಮಿತ್ಸೋನಿಯನ್ ರಾಷ್ಟ್ರೀಯ ವಾಯು ಮತ್ತು ಬಾಹ್ಯಾಕಾಶ ಮ್ಯೂಸಿಯಂನಲ್ಲಿ ಸ್ಥಾನ ಪಡೆದಿದೆ. 2013ರ ನವೆಂಬರ್ 5ರಂದು ಆಂಧ್ರ ಪ್ರದೇಶದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಉಡಾವಣೆಗೊಂಡ ಭಾರತದ ಮಂಗಳಯಾನ ಯೋಜನೆ ದೇಶದ ಬಾಹ್ಯಾಕಾಶ ಇತಿಹಾಸದಲ್ಲಿ ಮಹತ್ವದ ಮೈಲಿಗಲ್ಲಾಗಿತ್ತು. ಈ ಮಿಷನ್ನಲ್ಲಿ ಉಪ ಕಾರ್ಯಾಚರಣೆ ನಿರ್ದೇಶಕರಾಗಿ ಕಾರ್ಯನಿರ್ವಹಿಸಿದ್ದ ನಂದಿನಿ ಹರಿನಾಥ್, ಮಿಷನ್ನ ಅತ್ಯಂತ ನಿರ್ಣಾಯಕ ದಿನದಂದು ಧರಿಸಿದ್ದ ಕೆಂಪು ಮತ್ತು ನೀಲಿ ಬಣ್ಣದ ರೇಷ್ಮೆ ಸೀರೆ ಇದೀಗ ಜಾಗತಿಕ ಗಮನ ಸೆಳೆದಿದೆ.
ಬಿಬಿಸಿಗೆ ನೀಡಿದ ಸಂದರ್ಶನದಲ್ಲಿ ನಂದಿನಿ ಹರಿನಾಥ್, 2013ರ ಡಿಸೆಂಬರ್ನಲ್ಲಿ ನಡೆದ ಅತ್ಯಂತ ನಿರ್ಣಾಯಕ ಕಾರ್ಯಾಚರಣೆಯ ದಿನ ಈ ವಿಶೇಷ ಸೀರೆಯನ್ನು ಧರಿಸಿದ್ದಾಗಿ ತಿಳಿಸಿದ್ದಾರೆ. ಅಂದು ಇಸ್ರೋ ವಿಜ್ಞಾನಿಗಳ ತಂಡವು ಬಾಹ್ಯಾಕಾಶ ನೌಕೆಯನ್ನು ಭೂಮಿಯ ಕಕ್ಷೆಯಿಂದ ಹೊರಕ್ಕೆ ಕಳುಹಿಸಿ, ಸುಮಾರು 300 ದಿನಗಳ ಮಂಗಳ ಗ್ರಹದತ್ತದ ಪ್ರಯಾಣಕ್ಕೆ ಮಾರ್ಗದರ್ಶನ ನೀಡಬೇಕಾಗಿತ್ತು. ಅದು ಮಾಡು ಇಲ್ಲವೇ ಮಡಿ ಎಂಬಂತ ಪರಿಸ್ಥಿತಿ. ಮಿಷನ್ನ ಅತ್ಯಂತ ಮಹತ್ವದ ಕಾರ್ಯಾಚರಣೆ ಅದಾಗಿತ್ತು. ನೌಕೆ ಯಾವ ದಿಕ್ಕಿಗೆ ಹೋಗಬೇಕು, ಹೇಗೆ ಹೋಗಬೇಕು ಮತ್ತು ಯಾವಾಗ ಹೋಗಬೇಕು ಎಂಬುದನ್ನು ನಾವು ನಿರ್ಧರಿಸಬೇಕಾಗಿತ್ತು. ಆ ದಿನ ನಾವು ತೆಗೆದುಕೊಂಡ ನಿರ್ಧಾರಗಳ ಮೇಲೆಯೇ ಮಿಷನ್ನ ಯಶಸ್ಸು ಅವಲಂಬಿತವಾಗಿತ್ತು ಎಂದು ಅವರು ಹೇಳಿದ್ದಾರೆ.
ನಂದಿನಿ ಹರಿನಾಥ್ ಧರಿಸಿದ್ದ ಈ ಸೀರೆ, ವಾಷಿಂಗ್ಟನ್ನ ಸ್ಮಿತ್ಸೋನಿಯನ್ ರಾಷ್ಟ್ರೀಯ ವಾಯು ಮತ್ತು ಬಾಹ್ಯಾಕಾಶ ಮ್ಯೂಸಿಯಂನ ಅಂತರಗ್ರಹ ವಿಜ್ಞಾನ ಸಂಗ್ರಹದಲ್ಲಿ ಸೇರಿಸಲಾದ ಭಾರತದ ಮೊದಲ ವಸ್ತು ಎಂಬ ವಿಶೇಷ ಗೌರವವನ್ನು ಪಡೆದುಕೊಂಡಿದೆ.
ಮಂಗಳಯಾನ 2014ರಲ್ಲಿ ಯಶಸ್ವಿಯಾಗಿ ಮಂಗಳ ಗ್ರಹದ ಕಕ್ಷೆ ಪ್ರವೇಶಿಸಿತ್ತು. ಇದರೊಂದಿಗೆ ಮೊದಲ ಪ್ರಯತ್ನದಲ್ಲೇ ಮಂಗಳ ಗ್ರಹ ತಲುಪಿದ ವಿಶ್ವದ ಮೊದಲ ದೇಶ ಎಂಬ ಹೆಗ್ಗಳಿಕೆಗೆ ಭಾರತ ಪಾತ್ರವಾಯಿತು. ನಂದಿನಿ ಹರಿನಾಥ್ ಅವರ ಸೀರೆ ಕೇವಲ ಒಂದು ಉಡುಪಲ್ಲ; ಅದು ಭಾರತದ ವಿಜ್ಞಾನ, ಮಹಿಳಾ ಸಾಧನೆ ಮತ್ತು ಬಾಹ್ಯಾಕಾಶ ಕ್ಷೇತ್ರದಲ್ಲಿನ ಐತಿಹಾಸಿಕ ಯಶಸ್ಸಿನ ಸಂಕೇತವಾಗಿ ಇದೀಗ ಜಾಗತಿಕ ಸಂಗ್ರಹಾಲಯದಲ್ಲಿ ಸ್ಥಾನ ಪಡೆದಿದೆ.
ISRO scientist Nandini Harinath’s saree at the US space museum…! – ತುಳು ಟೈಮ್ಸ್
ಇದನ್ನೂ ಓದಿ : ಎಐ ತಂತ್ರಜ್ಞಾನದಿಂದ ಹೆದ್ದಾರಿಗಳ ಮೇಲ್ವಿಚಾರಣೆ
====
ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ : https://youtu.be/6-XRjvQxFRs
