ವೈರಲ್ : Tulu Times l 2026ರ ಕ್ಯಾಲೆಂಡರ್ ರಚನೆ 1914ರ ಕ್ಯಾಲೆಂಡರ್ಗೆ ಸರಿಹೊಂದಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ. 1914ರಲ್ಲಿ ಪ್ರಾರಂಭವಾದ ಒಂದನೇ ಮಹಾಯುದ್ಧ ಮಾನವ ಇತಿಹಾಸದ ಅತ್ಯಂತ ಭೀಕರ ಯುದ್ಧಗಳಲ್ಲಿ ಒಂದಾಗಿದ್ದರಿಂದ ಈ ಸಾಮ್ಯತೆ ಬಗ್ಗೆ ಕೆಲವರು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.
ಗಣಿತದ ಲೆಕ್ಕಾಚಾರದ ಪ್ರಕಾರ 1914 ಮತ್ತು 2026 ಎರಡೂ ವರ್ಷಗಳು ಗುರುವಾರದಿಂದ ಆರಂಭವಾಗುತ್ತವೆ. ಈ ಕಾರಣದಿಂದಾಗಿ ಎರಡು ವರ್ಷಗಳಲ್ಲೂ ಪ್ರತಿಯೊಂದು ದಿನಾಂಕವೂ ಒಂದೇ ವಾರದ ದಿನಕ್ಕೆ ಬರುತ್ತದೆ. ಉದಾಹರಣೆಗೆ 1914ರ ಜನವರಿ 1 ಮತ್ತು 2026ರ ಜನವರಿ 1 ಎರಡೂ ಗುರುವಾರದಂದೇ ಬರುತ್ತವೆ. ಈ ರೀತಿಯ ಹೊಂದಾಣಿಕೆ ಗ್ರೆಗೋರಿಯನ್ ಕ್ಯಾಲೆಂಡರ್ ಪದ್ಧತಿಯಲ್ಲಿ ಕೆಲಕಾಲಕ್ಕೊಮ್ಮೆ ಸಂಭವಿಸುವ ಸಾಮಾನ್ಯ ಘಟನೆ ಎಂದು ತಜ್ಞರು ತಿಳಿಸಿದ್ದಾರೆ.
1914ರ ಐತಿಹಾಸಿಕ ಮಹತ್ವ ;
1914ರ ಜೂನ್ 28ರಂದು ಆರ್ಚ್ಡ್ಯೂಕ್ ಫ್ರಾಂಜ್ ಫರ್ಡಿನಾಂಡ್ ಅವರನ್ನು ಹತ್ಯೆ ಮಾಡಲಾಯಿತು. ಈ ಘಟನೆ ಬಳಿಕ ಯುರೋಪಿನ ಹಲವು ದೇಶಗಳು ಯುದ್ಧ ಘೋಷಣೆ ಮಾಡಿದ್ದು, ಅದು ಅಂತಿಮವಾಗಿ ವಿಶ್ವಯುದ್ಧಕ್ಕೆ ಕಾರಣವಾಯಿತು. ಸುಮಾರು ನಾಲ್ಕು ವರ್ಷಗಳ ಕಾಲ ನಡೆದ ಈ ಯುದ್ಧದಲ್ಲಿ ಲಕ್ಷಾಂತರ ಜನರು ಪ್ರಾಣ ಕಳೆದುಕೊಂಡರು.
ಇತ್ತೀಚೆಗೆ ಮಧ್ಯಪ್ರಾಚ್ಯದಲ್ಲಿ ಇರಾನ್ ಮತ್ತು ಇಸ್ರೇಲ್ ನಡುವಿನ ಉದ್ವಿಗ್ನತೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಕೆಲವರು 1914 ಮತ್ತು 2026ರ ಕ್ಯಾಲೆಂಡರ್ ಸಾಮ್ಯತೆಯನ್ನು ಉಲ್ಲೇಖಿಸಿ ವಿವಿಧ ಊಹಾಪೋಹಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಆದರೆ ಇತಿಹಾಸ ತಜ್ಞರು ಮತ್ತು ವಿಜ್ಞಾನಿಗಳು ಈ ರೀತಿಯ ವಾದಗಳನ್ನು ಎಚ್ಚರಿಕೆಯಿಂದ ನೋಡಬೇಕು ಎಂದು ಸಲಹೆ ನೀಡಿದ್ದಾರೆ. ಅವರ ಪ್ರಕಾರ, ಕ್ಯಾಲೆಂಡರ್ ಹೊಂದಾಣಿಕೆ ಕೇವಲ ಗಣಿತೀಯ ಕಾರಣದಿಂದ ಸಂಭವಿಸುವುದೇ ಹೊರತು, ಭವಿಷ್ಯದ ಘಟನೆಗಳಿಗೆ ಅದರೊಂದಿಗೆ ಯಾವುದೇ ನೇರ ಸಂಬಂಧವಿಲ್ಲ ಎನ್ನುತ್ತಾರೆ.
2026 Calendar Compared to 1914 Calendar: Did This Calendar Prediction Cause War? – ತುಳುಟೈಮ್ಸ್
ಇದನ್ನೂ ಓದಿ : ಎಲ್ಪಿಜಿ ಸಿಲಿಂಡರ್ ಬುಕ್ಕಿಂಗ್ ಅವಧಿ 21 ದಿನದಿಂದ 25 ದಿನಕ್ಕೆ ಹೆಚ್ಚಳ
====
ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ :https://youtu.be/65g4QkcjfLA?si=vGodvlvx9LK1Cl3S
