ಕರ್ನಾಟಕ : Tulu Times l ದೇಶದಲ್ಲಿ ಚಿನ್ನದ ಆಮದು ವ್ಯವಸ್ಥೆಯಲ್ಲಿ ಹೆಚ್ಚಿನ ಪಾರದರ್ಶಕತೆ ಮತ್ತು ನಿಯಂತ್ರಣ ತರಲು ಕೇಂದ್ರ ಸರ್ಕಾರ ಹೊಸ ಕಟ್ಟುನಿಟ್ಟಿನ ಮಾರ್ಗಸೂಚಿಗಳನ್ನು ಜಾರಿಗೊಳಿಸಿದೆ. ವಿದೇಶಿ ವ್ಯಾಪಾರದ ಮಹಾನಿರ್ದೇಶನಾಲಯ ಚಿನ್ನದ ಆಮದು-ರಫ್ತು ವ್ಯವಹಾರಗಳಲ್ಲಿ ತೊಡಗಿರುವ ಕಂಪನಿಗಳಿಗೆ ಹೊಸ ನಿಯಮಗಳನ್ನು ಒಳಗೊಂಡ ಮಹತ್ವದ ಅಧಿಸೂಚನೆ ಹೊರಡಿಸಿದೆ.
ಹೊಸ ನಿಯಮಗಳ ಪ್ರಕಾರ, ‘ಅಡ್ವಾನ್ಸ್ ಆಥರೈಜೇಶನ್’ ಯೋಜನೆಯಡಿ ಚಿನ್ನ ಆಮದು ಮಾಡುವ ಕಂಪೆನಿಗಳಿಗೆ ಗರಿಷ್ಠ 100 ಕಿಲೋಗ್ರಾಂ ಚಿನ್ನವನ್ನು ಮಾತ್ರ ಆಮದು ಮಾಡಲು ಅವಕಾಶ ನೀಡಲಾಗಿದೆ. ಇದೇ ವೇಳೆ ಮೊದಲ ಬಾರಿಗೆ ಅನುಮತಿ ಪಡೆಯಲು ಅರ್ಜಿ ಸಲ್ಲಿಸುವ ಕಂಪನಿಗಳಿಗೆ ಕಾರ್ಖಾನೆ ತಪಾಸಣೆ ಕಡ್ಡಾಯಗೊಳಿಸಲಾಗಿದೆ.
ಅಧಿಕಾರಿಗಳ ಪ್ರಕಾರ, ಚಿನ್ನದ ವ್ಯವಹಾರಗಳ ಮೇಲಿನ ನಿಗಾವನ್ನು ಬಲಪಡಿಸಲು ಹಾಗೂ ಆಮದು ವ್ಯವಸ್ಥೆಯ ದುರುಪಯೋಗ ತಡೆಯಲು ಈ ಹೊಸ ನಿಯಮಗಳನ್ನು ತಕ್ಷಣದಿಂದಲೇ ಜಾರಿಗೆ ತರಲಾಗಿದೆ. ಹೊಸ ಮಾರ್ಗಸೂಚಿಗಳ ಅನ್ವಯ, ಕಂಪನಿಗಳು ಹಿಂದಿನ ರಫ್ತು ಬಾಧ್ಯತೆಯ ಕನಿಷ್ಠ 50 ಶೇಕಡಾವನ್ನು ಪೂರ್ಣಗೊಳಿಸಿದ ಬಳಿಕವೇ ಹೊಸ ಆಮದು ಅನುಮತಿಗಾಗಿ ಅರ್ಜಿ ಸಲ್ಲಿಸಲು ಸಾಧ್ಯವಾಗುತ್ತದೆ.
ಇದರ ಜೊತೆಗೆ, ಚಿನ್ನದ ಆಮದು ಮತ್ತು ರಫ್ತು ಕುರಿತ ವಿವರವಾದ ವರದಿಗಳನ್ನು ಪ್ರತೀ 15 ದಿನಗಳಿಗೊಮ್ಮೆ ಸಲ್ಲಿಸುವುದು ಕಡ್ಡಾಯವಾಗಿದೆ. ಹೊಸ ವ್ಯವಸ್ಥೆಯಡಿ ಚಿನ್ನ ಸಂಬಂಧಿತ ವ್ಯವಹಾರಗಳ ಮೇಲೆ ಡಿಜಿಎಫ್ಟಿ ಕೇಂದ್ರೀಯ ಮಟ್ಟದಲ್ಲಿ ನಿಗಾ ವಹಿಸಲಿದೆ. ಕಂಪೆನಿಗಳು ಚಾರ್ಟರ್ಡ್ ಅಕೌಂಟೆಂಟ್ ದೃಢೀಕರಿಸಿದ ಕಾರ್ಯಕ್ಷಮತಾ ವರದಿಗಳನ್ನೂ ಸಲ್ಲಿಸಬೇಕಾಗಿದೆ.
ಪ್ರಾದೇಶಿಕ ಕಚೇರಿಗಳು ಪ್ರತೀ ತಿಂಗಳು ಸಮಗ್ರ ವರದಿಯನ್ನು ಡಿಜಿಎಫ್ಟಿ ಮುಖ್ಯ ಕಚೇರಿಗೆ ಸಲ್ಲಿಸುವಂತೆ ಸೂಚಿಸಲಾಗಿದೆ. ಅಕ್ರಮ ಚಿನ್ನದ ಆಮದು, ಮೇಲ್ವಿಚಾರಣೆಯ ಕೊರತೆ ಮತ್ತು ರಫ್ತು ಬಾಧ್ಯತೆ ಉಲ್ಲಂಘನೆಗಳ ಬಗ್ಗೆ ಹೆಚ್ಚುತ್ತಿರುವ ಆತಂಕದ ಹಿನ್ನೆಲೆ ಸರ್ಕಾರ ಈ ಕ್ರಮ ಕೈಗೊಂಡಿದೆ. ಹೊಸ ನಿಯಮಗಳು ಚಿನ್ನದ ವ್ಯಾಪಾರ ಕ್ಷೇತ್ರದಲ್ಲಿ ಹೆಚ್ಚಿನ ಹೊಣೆಗಾರಿಕೆ ಮತ್ತು ಪಾರದರ್ಶಕತೆ ತರಲಿದ್ದು, ನಿಯಮ ಉಲ್ಲಂಘನೆಗಳನ್ನು ತಡೆಯಲು ಸಹಕಾರಿಯಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಉದ್ಯಮ ವಲಯದ ಅಭಿಪ್ರಾಯದಂತೆ, ಹೊಸ ಮಾರ್ಗಸೂಚಿಗಳು ವಿಶೇಷವಾಗಿ ಸಣ್ಣ ಮತ್ತು ಹೊಸ ಕಂಪೆನಿಗಳಿಗೆ ಹೆಚ್ಚುವರಿ ದಾಖಲೆಪತ್ರ, ತಪಾಸಣೆ ಮತ್ತು ನಿಯಮ ಪಾಲನೆ ಹೊಣೆಗಾರಿಕೆಯನ್ನು ಹೆಚ್ಚಿಸಬಹುದು. ಆದರೆ ದೇಶದ ಅತಿ ದೊಡ್ಡ ವ್ಯಾಪಾರ ಕ್ಷೇತ್ರಗಳಲ್ಲಿ ಒಂದಾದ ಚಿನ್ನದ ಆಮದು ವ್ಯವಸ್ಥೆಯನ್ನು ಸುಸೂತ್ರಗೊಳಿಸಲು ಕಟ್ಟುನಿಟ್ಟಿನ ನಿಯಮಗಳು ಅಗತ್ಯವೆಂದು ಸರ್ಕಾರ ಸಮರ್ಥಿಸಿದೆ.
Centre’s strict rules on gold import: 100 kg limit, mandatory inspection implemented – ತುಳುಟೈಮ್ಸ್
ಇದನ್ನೂ ಓದಿ :ವಿಚ್ಛೇದನ ವಿವಾದ, ಸೈಬರ್ ಟ್ರೋಲಿಂಗ್ ಕುರಿತು ಮೌನ ಮುರಿದ ರವಿ ಮೋಹನ್
===
ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ :https://www.youtube.com/live/4pEuD7fDOuo?si=xQzJLgAe0P0bhDBK
