ಸುಳ್ಯ : ವಿಷ್ಣುವರ್ಧನ್‌ರನ್ನು ಹಲವು ಬಾರಿ ಭೇಟಿಯಾದ ಸುಳ್ಯದ ಆಟೋ ಚಾಲಕನ ನೆನಪುಗಳ ಪಯಣ

ಸುಳ್ಯ : Tulu Times l ಸುಳ್ಯದ ರಥಬೀದಿಯ ನಿವಾಸಿ ಹರಿಶ್ಚಂದ್ರ ಪಂಡಿತ್ (62) ಅವರು ಕಳೆದ 40 ವರ್ಷಗಳಿಂದ ಆಟೋ ಚಾಲಕರಾಗಿ ಸೇವೆ ಸಲ್ಲಿಸುತ್ತಿರುವುದರ ಜೊತೆಗೆ ಕನ್ನಡ ಚಿತ್ರರಂಗದ, ಅದರಲ್ಲೂ ನಟ ಡಾ. ವಿಷ್ಣುವರ್ಧನ್ ಅವರ ಅಪ್ಪಟ ಅಭಿಮಾನಿಯಾಗಿ ಗುರುತಿಸಿಕೊಂಡಿದ್ದಾರೆ. ಪ್ರಸ್ತುತ ಅವರು ವಿಷ್ಣುವರ್ಧನ್ ಅಭಿಮಾನಿ ಸಂಘದ ಸುಳ್ಯ ತಾಲೂಕು ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ಆಟೋ ಚಾಲಕರಾಗುವ ಮುನ್ನ ಮತ್ತು ಅದರೊಂದಿಗೆ ಸಮಾನಾಂತರವಾಗಿ ಅವರು ಸುಮಾರು 18 ವರ್ಷಗಳ ಕಾಲ ಸಿನಿಮಾ ಥಿಯೇಟರ್‌ಗಳಲ್ಲಿ ಕೆಲಸ ಮಾಡಿದ್ದರು. ಫ್ಲೆಕ್ಸ್ ತಂತ್ರಜ್ಞಾನವೇ ಇಲ್ಲದ ಕಾಲದಲ್ಲಿ ಚಿತ್ರಗಳ ಹೆಸರು ಫಲಕಗಳು, ಬ್ಯಾನರ್‌ಗಳು ಹಾಗೂ ಬಟ್ಟೆಯ ಮೇಲಿನ ಜಾಹೀರಾತುಗಳನ್ನು ಕೈಯಿಂದ ಬರೆಯುವ ಕಲಾವಿದರಾಗಿದ್ದರು. ಸುಳ್ಯ ಮಾತ್ರವಲ್ಲದೆ ಪುತ್ತೂರು ಮತ್ತು ವಿರಾಜಪೇಟೆಯ ಚಿತ್ರಮಂದಿರಗಳಿಗೂ ತೆರಳಿ ಹೊಸ ಸಿನಿಮಾಗಳ ಹೆಸರು ಫಲಕಗಳನ್ನು ಬರೆಯುತ್ತಿದ್ದರು. ಆ ದಿನಗಳಲ್ಲಿ ಒಂದು ಬೋರ್ಡ್ ಬರೆಯಲು ಕೇವಲ ₹10 ರಿಂದ ₹17ರವರೆಗೆ ಸಂಭಾವನೆ ದೊರೆಯುತ್ತಿತ್ತು. 1980ರ ದಶಕದಿಂದಲೇ ಈ ಕಲೆಯಲ್ಲಿ ತೊಡಗಿಸಿಕೊಂಡಿದ್ದ ಅವರು ತಮ್ಮ ಕೈಬರಹದ ಮೂಲಕ ಸಿನಿಪ್ರೇಮಿಗಳ ಗಮನ ಸೆಳೆದಿದ್ದರು.

ಡಾ. ವಿಷ್ಣುವರ್ಧನ್ ಅವರ ಮೇಲಿನ ಅಪಾರ ಅಭಿಮಾನದಿಂದ ಮೈಸೂರು ಹಾಗೂ ಮಂಡ್ಯದಲ್ಲಿ ನಡೆಯುತ್ತಿದ್ದ ಅವರ ಜನ್ಮದಿನ ಕಾರ್ಯಕ್ರಮಗಳಿಗೆ ನಿಯಮಿತವಾಗಿ ತೆರಳಿ ಅವರನ್ನು ಹಲವು ಬಾರಿ ಭೇಟಿ ಮಾಡುವ ಅವಕಾಶ ಪಡೆದಿದ್ದಾರೆ. ಪುತ್ತೂರಿನಲ್ಲಿ ನಡೆದ ‘ಸಂಗೀತ ರಸಮಂಜರಿ’ ಕಾರ್ಯಕ್ರಮದಲ್ಲೂ ಡಾ. ವಿಷ್ಣುವರ್ಧನ್ ಹಾಗೂ ಅವರ ಪತ್ನಿ ಭಾರತಿ ವಿಷ್ಣುವರ್ಧನ್ ಅವರನ್ನು ಭೇಟಿಯಾಗಿ ಮಾತನಾಡಿದ ಕ್ಷಣಗಳನ್ನು ಅವರು ಇಂದಿಗೂ ಹೆಮ್ಮೆಯಿಂದ ನೆನಪಿಸಿಕೊಳ್ಳುತ್ತಾರೆ.

ಸಂಪಾಜೆಯ ಕೊಯಿನಾಡು ಸೇತುವೆ ಸಮೀಪ ‘ಮುತ್ತಿನ ಹಾರ’ ಚಿತ್ರದ ಚಿತ್ರೀಕರಣ ಸುಮಾರು ಒಂಬತ್ತು ದಿನ ನಡೆದಾಗಲೂ ಅವರು ಸ್ಥಳಕ್ಕೆ ಭೇಟಿ ನೀಡಿ ವಿಷ್ಣುವರ್ಧನ್ ಅವರನ್ನು ಭೇಟಿಯಾಗಿದ್ದರು. ಆ ನೆನಪುಗಳು ಅವರ ಜೀವನದ ಅಮೂಲ್ಯ ಕ್ಷಣಗಳಾಗಿವೆ. ವಿಷ್ಣುವರ್ಧನ್ ಮಾತ್ರವಲ್ಲದೆ ಅಂಬರೀಶ್, ಶ್ರೀನಾಥ್, ಶಶಿಕುಮಾರ್, ಸುಹಾಸಿನಿ ಸೇರಿದಂತೆ ಹಲವು ಕಲಾವಿದರನ್ನು ಭೇಟಿಯಾಗಿರುವ ಹರಿಶ್ಚಂದ್ರ ಪಂಡಿತ್, ನಟ ಅಶ್ವತ್ ಹಾಗೂ ಬಾಲಿವುಡ್ ಮಹಾನಟ ಅಮಿತಾಭ್ ಬಚ್ಚನ್ ಅವರು ಸುಳ್ಯಕ್ಕೆ ಆಗಮಿಸಿದ ಸಂದರ್ಭದಲ್ಲೂ ಮಾತನಾಡುವ ಅವಕಾಶ ಪಡೆದಿದ್ದಾರೆ. ಆಟೋ ಚಾಲನೆಯಂತಹ ಸಾಮಾನ್ಯ ವೃತ್ತಿಯ ಜೊತೆಗೆ ಸಿನಿಪ್ರೀತಿ, ಕೈಬರಹದ ಕಲೆಯ ಮೇಲಿನ ಆಸಕ್ತಿ ಮತ್ತು ಕಲಾವಿದರೊಂದಿಗಿನ ಅಪೂರ್ವ ನೆನಪುಗಳನ್ನು ಜೀವನಪೂರ್ತಿ ಉಳಿಸಿಕೊಂಡಿರುವ ಹರಿಶ್ಚಂದ್ರ ಪಂಡಿತ್ ಅವರ ಬದುಕು ಇಂದಿನ ಯುವಪೀಳಿಗೆಗೆ ಪ್ರೇರಣೆಯಾಗಿದೆ.

Sullia: A journey down memory lane for a Sullia auto-rickshaw driver who met Vishnuvardhan several times – ತುಳುಟೈಮ್ಸ್

ಇದನ್ನೂ ಓದಿ :ಬಹುಭಾಷಾ ಚಿತ್ರರಂಗಕ್ಕೆ ಅಪಾರ ನಷ್ಟ ; ಕ್ಯಾನ್ಸರ್‌ಗೆ ಖ್ಯಾತ ನಟ ಪ್ರದೀಪ್ ರಾವತ್ ಬಲಿ

===

ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್  ಮಾಡಿ :https://youtu.be/IKW_z7twgxc