ಭಾರತದಲ್ಲಿ ವಿಮಾನ ಸೇವೆ ಆರಂಭಿಸಲು ವಿದೇಶಿ ಏರ್‌ಲೈನ್ಸ್‌ಗೆ ಹೊಸ ನಿಯಮ ಜಾರಿ

ನವದೆಹಲಿ: Tulu Times l ಭಾರತಕ್ಕೆ ವಿಮಾನ ಸೇವೆ ಆರಂಭಿಸಲು ಬಯಸುವ ವಿದೇಶಿ ಏರ್‌ಲೈನ್ಸ್‌ಗಳಿಗೆ ಹೊಸ ಮಾರ್ಗಸೂಚಿಗಳನ್ನು ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ ಪ್ರಕಟಿಸಿದೆ. ವಿಮಾನ ಸೇವೆ ಆರಂಭಿಸುವ ಮೊದಲು ಅನುಮತಿ ಪಡೆಯುವ ವಿಧಾನ, ಅಗತ್ಯ ದಾಖಲೆಗಳು ಮತ್ತು ನಿಯಮ ಪಾಲನೆ ಕುರಿತ ವಿವರಗಳನ್ನು ಈ ಮಾರ್ಗಸೂಚಿಯಲ್ಲಿ ನೀಡಲಾಗಿದೆ.

ಒಪ್ಪಂದ ಇದ್ದರೂ ನಿರ್ದೇಶನಾಲಯದ ಅನುಮತಿ ಕಡ್ಡಾಯ ;

ಭಾರತ ಮತ್ತು ಇತರ ದೇಶಗಳ ನಡುವೆ ಇರುವ ದ್ವಿಪಕ್ಷೀಯ ವಾಯು ಸೇವಾ ಒಪ್ಪಂದದಡಿ ವಿಮಾನ ಸೇವೆಗಳಿಗೆ ಅವಕಾಶ ಇದ್ದರೂ, ವಿದೇಶಿ ಏರ್‌ಲೈನ್ಸ್‌ಗಳು ಭಾರತದಲ್ಲಿ ಕಾರ್ಯಾಚರಣೆ ಆರಂಭಿಸುವ ಮೊದಲು ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯದಿಂದ ವಿಶೇಷ ಅನುಮತಿ ಪಡೆಯುವುದು ಕಡ್ಡಾಯ ಎಂದು ನಿಯಂತ್ರಣ ಸಂಸ್ಥೆ ತಿಳಿಸಿದೆ.

ಸರ್ಕಾರದಿಂದ ಅಧಿಕೃತ ನಾಮನಿರ್ದೇಶನ ಅಗತ್ಯ ;

ವಿದೇಶಿ ಏರ್‌ಲೈನ್ಸ್‌ಗಳು ಮೊದಲಿಗೆ ತಮ್ಮ ದೇಶದ ಸರ್ಕಾರದಿಂದ ಅಧಿಕೃತವಾಗಿ ನಾಮನಿರ್ದೇಶನಗೊಳ್ಳಬೇಕು. ಈ ನಾಮನಿರ್ದೇಶನವನ್ನು ರಾಜತಾಂತ್ರಿಕ ಮಾರ್ಗಗಳ ಮೂಲಕ ಲಿಖಿತ ರೂಪದಲ್ಲಿ ಭಾರತಕ್ಕೆ ತಿಳಿಸಬೇಕು. ಬಳಿಕವೇ ಆ ಏರ್‌ಲೈನ್ ಭಾರತದಲ್ಲಿ ಸೇವೆ ಆರಂಭಿಸಲು ಅರ್ಜಿ ಸಲ್ಲಿಸಬಹುದು. DGCA ಸಂಸ್ಥೆ ಆ ಏರ್‌ಲೈನ್‌ನ ಮಾಲೀಕತ್ವ ಮತ್ತು ನಿಯಂತ್ರಣ ಅದರ ಮೂಲ ದೇಶದವರಲ್ಲೇ ಉಳಿದಿದೆಯೇ ಎಂಬುದನ್ನು ಪರಿಶೀಲಿಸಿದ ನಂತರ ಮಾತ್ರ ಅನುಮತಿ ನೀಡಲಿದೆ.

ಭಾರತದಲ್ಲಿ ಕಾರ್ಯಾಚರಣೆ ನಡೆಸಲು ವಿದೇಶಿ ಏರ್‌ಲೈನ್ಸ್‌ಗಳು ಒಬ್ಬ ಸ್ಥಳೀಯ ಪ್ರತಿನಿಧಿಯನ್ನು ನೇಮಕ ಮಾಡಬೇಕು. ಅವರು ಭಾರತೀಯ ನಾಗರಿಕರಾಗಿರಬಹುದು ಅಥವಾ ಭಾರತದಲ್ಲಿ ನೋಂದಾಯಿತ ಸಂಸ್ಥೆಯಾಗಿರಬಹುದು. ಈ ಪ್ರತಿನಿಧಿಯೇ DGCA ಜೊತೆಗೆ ಎಲ್ಲಾ ಸಂವಹನ ನಡೆಸುವ ಅಧಿಕೃತ ಸಂಪರ್ಕ ವ್ಯಕ್ತಿಯಾಗಿರುತ್ತಾರೆ. ಅಲ್ಲದೇ, ವಿಮಾನ ಸೇವೆ ಆರಂಭಿಸುವ ದಿನಾಂಕಕ್ಕಿಂತ ಕನಿಷ್ಠ 90 ದಿನಗಳ ಮೊದಲು ಕಾರ್ಯಾಚರಣಾ ಅನುಮತಿಗಾಗಿ ಅರ್ಜಿ ಸಲ್ಲಿಸಬೇಕು. ಅರ್ಜಿಯಲ್ಲಿ ವಿಮಾನಗಳ ವಿವರ, ಕಳೆದ ಐದು ವರ್ಷಗಳ ಅಪಘಾತ ಅಥವಾ ಘಟನೆಗಳ ದಾಖಲೆ, ವಿಮಾನ ನಿರ್ವಹಣೆ ಮತ್ತು ಗ್ರೌಂಡ್ ಹ್ಯಾಂಡ್ಲಿಂಗ್ ವ್ಯವಸ್ಥೆಗಳ ಮಾಹಿತಿ ನೀಡಬೇಕು.

ಒಮ್ಮೆ ಅನುಮತಿ ದೊರೆತರೆ ಅದು ಗರಿಷ್ಠ ಐದು ವರ್ಷಗಳವರೆಗೆ ಮಾನ್ಯವಾಗಿರುತ್ತದೆ. ಆದರೆ ಈ ಅವಧಿಯಲ್ಲಿ ಭಾರತೀಯ ವಿಮಾನಯಾನ ಕಾನೂನುಗಳು ಮತ್ತು ಸುರಕ್ಷತಾ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು. ಉಲ್ಲಂಘನೆ ಕಂಡುಬಂದರೆ ಅನುಮತಿಯನ್ನು ಅಮಾನತುಗೊಳಿಸುವ ಅಥವಾ ರದ್ದುಗೊಳಿಸುವ ಅಧಿಕಾರ DGCAಗೆ ಇರುತ್ತದೆ.

ಪ್ರಯಾಣಿಕರ ದೂರು ಪರಿಹಾರ ವ್ಯವಸ್ಥೆ ಕಡ್ಡಾಯ

ವಿಮಾನ ವೇಳಾಪಟ್ಟಿಯನ್ನು ಸೇವೆ ಆರಂಭಕ್ಕೂ ಕನಿಷ್ಠ 30 ದಿನಗಳ ಮೊದಲು DGCAಗೆ ಸಲ್ಲಿಸಬೇಕು. ಜೊತೆಗೆ ಪ್ರತಿಯೊಂದು ವಿದೇಶಿ ಏರ್‌ಲೈನ್ ಭಾರತದಲ್ಲಿ ಪ್ರಯಾಣಿಕರ ದೂರು ಪರಿಹಾರ ವ್ಯವಸ್ಥೆ ಸ್ಥಾಪಿಸುವುದನ್ನು ಕಡ್ಡಾಯಗೊಳಿಸಲಾಗಿದೆ. ಒಟ್ಟಿನಲ್ಲಿ, ಭಾರತದಲ್ಲಿ ಕಾರ್ಯಾಚರಣೆ ಆರಂಭಿಸುವ ವಿದೇಶಿ ಏರ್‌ಲೈನ್ಸ್‌ಗಳು ಸುರಕ್ಷತೆ, ನಿಯಂತ್ರಣ ಮತ್ತು ಪ್ರಯಾಣಿಕರ ಹಿತಾಸಕ್ತಿಗಳನ್ನು ಕಾಪಾಡುವಂತೆ ಈ ಹೊಸ ಮಾರ್ಗಸೂಚಿಗಳನ್ನು DGCA ಪ್ರಕಟಿಸಿದೆ.

New rules for foreign airlines to start flight services in India

ಇದನ್ನೂ ಓದಿ : ಪುತ್ತೂರು ಮಹಾಲಿಂಗೇಶ್ವರ ದೇವಸ್ಥಾನ‌ದ ನಟರಾಜ ವೇದಿಕೆಯಲ್ಲಿ ರಾಜಕೀಯ ಕಾರ್ಯಕ್ರಮ : ಬಿಜೆಪಿ ಮಹಿಳಾ ಮೋರ್ಚಾದಿಂದ ದೂರು

====

ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್  ಮಾಡಿ :https://youtu.be/M5KHFoRyvfU?si=TuZdKESciETTqk3c