ನೀಟ್ : Tulu Times l ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯು ನೀಟ್ 2026 ಪರೀಕ್ಷೆಯ ಶುಲ್ಕ ಮರುಪಾವತಿಗಾಗಿ ಬ್ಯಾಂಕ್ ಖಾತೆಯ ವಿವರಗಳನ್ನು ದೃಢೀಕರಿಸಲು ಅಥವಾ ತಿದ್ದುಪಡಿ ಮಾಡಲು ನೀಡಿದ್ದ ಗಡುವನ್ನು ಜುಲೈ 7, ರಾತ್ರಿ 11:50ರವರೆಗೆ ವಿಸ್ತರಿಸಿದೆ
ಮೇ 3ರಂದು ನಡೆದ ನೀಟ್ ಪರೀಕ್ಷೆ ರದ್ದಾದ ಹಿನ್ನೆಲೆಯಲ್ಲಿ ಅರ್ಹ ಅಭ್ಯರ್ಥಿಗಳಿಗೆ ಶುಲ್ಕ ಮರುಪಾವತಿ ನೀಡುವ ಪ್ರಕ್ರಿಯೆ ನಡೆಯುತ್ತಿದ್ದು, ಬ್ಯಾಂಕ್ ವಿವರಗಳಲ್ಲಿನ ದೋಷಗಳಿಂದ ಮರುಪಾವತಿ ವಿಳಂಬವಾಗದಂತೆ ಈ ಕೊನೆಯ ಅವಕಾಶವನ್ನು ಕಲ್ಪಿಸಲಾಗಿದೆ. ಅಭ್ಯರ್ಥಿಗಳು ಅಧಿಕೃತ ನೀಟ್ ವೆಬ್ಸೈಟ್ಗೆ ಲಾಗಿನ್ ಆಗಿ, ಎರಡು ಹಂತದ ದೃಢೀಕರಣ ಪೂರ್ಣಗೊಳಿಸಿದ ಬಳಿಕ ಬ್ಯಾಂಕ್ ಖಾತೆ ವಿವರಗಳ ದೃಢೀಕರಣ / ತಿದ್ದುಪಡಿ ವಿಭಾಗದಲ್ಲಿ ಖಾತೆದಾರರ ಹೆಸರು, ಬ್ಯಾಂಕ್ ಖಾತೆ ಸಂಖ್ಯೆ, IFSC ಕೋಡ್ ಹಾಗೂ ಬ್ಯಾಂಕ್ ಹೆಸರನ್ನು ಪರಿಶೀಲಿಸಿ ಅಗತ್ಯವಿದ್ದರೆ ತಿದ್ದುಪಡಿ ಮಾಡಬೇಕು.
ರದ್ದುಗೊಳಿಸಿದ ಚೆಕ್ ಪ್ರತಿಯನ್ನು ಅಪ್ಲೋಡ್ ಮಾಡುವುದು ಕಡ್ಡಾಯವಲ್ಲದಿದ್ದರೂ, ತಪ್ಪುಗಳ ಸಾಧ್ಯತೆಯನ್ನು ಕಡಿಮೆ ಮಾಡಲು ಅದನ್ನು ಸಲ್ಲಿಸುವಂತೆ NTA ಸಲಹೆ ನೀಡಿದೆ. ಒಟಿಪಿ ದೃಢೀಕರಣದ ಬಳಿಕ ಸಲ್ಲಿಸಿದ ಬ್ಯಾಂಕ್ ವಿವರಗಳನ್ನು ಅಂತಿಮವೆಂದು ಪರಿಗಣಿಸಲಾಗುತ್ತದೆ. ಆದ್ದರಿಂದ ಯಾವುದೇ ತಪ್ಪುಗಳಿಲ್ಲದಂತೆ ಮಾಹಿತಿಯನ್ನು ಎಚ್ಚರಿಕೆಯಿಂದ ಪರಿಶೀಲಿಸಿ ಸಲ್ಲಿಸುವಂತೆ ಅಭ್ಯರ್ಥಿಗಳಿಗೆ ಸೂಚಿಸಲಾಗಿದೆ.
ಮರುಪಾವತಿ ಮೊತ್ತವನ್ನು ಯಾವ ದಿನಾಂಕದಿಂದ ಖಾತೆಗೆ ಜಮಾ ಮಾಡಲಾಗುತ್ತದೆ ಎಂಬುದನ್ನು ಎನ್ ಟಿಎ ಇನ್ನೂ ಪ್ರಕಟಿಸಿಲ್ಲ. ಆದರೆ ಬ್ಯಾಂಕ್ ವಿವರಗಳ ಪರಿಶೀಲನೆ ಪೂರ್ಣಗೊಂಡ ನಂತರ ಹಂತ ಹಂತವಾಗಿ ಮರುಪಾವತಿ ಪ್ರಕ್ರಿಯೆ ಆರಂಭವಾಗಲಿದೆ ಎಂದು ತಿಳಿಸಿದೆ. ಜುಲೈ 7ರೊಳಗೆ ಬ್ಯಾಂಕ್ ವಿವರಗಳನ್ನು ದೃಢೀಕರಿಸದ ಅಥವಾ ತಿದ್ದುಪಡಿ ಮಾಡದ ಅಭ್ಯರ್ಥಿಗಳ ಮರುಪಾವತಿ ವಿಳಂಬವಾಗುವ ಅಥವಾ ನಂತರ ಪ್ರತ್ಯೇಕ ಪ್ರಕ್ರಿಯೆಯ ಮೂಲಕ ಹಣವನ್ನು ಪಡೆಯಬೇಕಾಗುವ ಸಾಧ್ಯತೆ ಇದೆ ಎಂದು ಎನ್ ಟಿಎ ಎಚ್ಚರಿಕೆ ನೀಡಿದೆ. ತಾಂತ್ರಿಕ ಸಮಸ್ಯೆಗಳು ಎದುರಾದರೆ ಅಧಿಕೃತ ನೀಟ್ ವೆಬ್ಸೈಟ್ನಲ್ಲಿರುವ Helpdesk ಹಾಗೂ FAQ ವಿಭಾಗದ ನೆರವು ಪಡೆಯಬಹುದು. ಅಲ್ಲದೆ, ವಿವರಗಳನ್ನು ಯಶಸ್ವಿಯಾಗಿ ಸಲ್ಲಿಸಿದ ಬಳಿಕ ದೃಢೀಕರಣ ರಸೀದಿ ಅಥವಾ ಸ್ಕ್ರೀನ್ಶಾಟ್ ಅನ್ನು ಸುರಕ್ಷಿತವಾಗಿ ಉಳಿಸಿಕೊಳ್ಳುವಂತೆ ಅಭ್ಯರ್ಥಿಗಳಿಗೆ ಸಲಹೆ ನೀಡಲಾಗಿದೆ.
NEET fee refund: Last chance to correct bank details till July 7 – ತುಳುಟೈಮ್ಸ್
ಇದನ್ನೂ ಓದಿ :ವಾಟ್ಸಾಪ್ ನ ಹೊಸ ಅಪ್ಡೇಟ್ ಮೇಲೆ ಕೇಂದ್ರದ ನಿಗಾ; ನಕಲಿ ಗುರುತಿನ ಆತಂಕ
====
ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ :https://youtube.com/shorts/h-3knmjHSyQ?feature=share
