ತಂತ್ರಜ್ಞಾನ : ಕಪ್ಪು ಚಿನ್ನವೆಂದೇ ಪ್ರಸಿದ್ಧಿಯಲ್ಲಿರುವ ಕಲ್ಲಿದ್ದಲ್ಲಿಗೆ ಹೊಸ ಜೀವ ತುಂಬುವ ಕೆಲಸ

ನವದೆಹಲಿ : Tulu Times l ಒಂದು ಕಾಲದಲ್ಲಿ ಪರಿಸರ ಮಾಲಿನ್ಯದ ಪ್ರಮುಖ ಕಾರಣವೆಂದು ಟೀಕೆಗೆ ಗುರಿಯಾಗಿದ್ದ ಕಲ್ಲಿದ್ದಲು ಈಗ ಭಾರತದ ಇಂಧನ ಭದ್ರತೆ ಮತ್ತು ಆರ್ಥಿಕ ಸ್ವಾವಲಂಬನೆಯ ಪ್ರಮುಖ ಅಸ್ತ್ರವಾಗಿ ಮರುಪರಿಚಯವಾಗುತ್ತಿದೆ. ಭಾರತೀಯ ವಿಜ್ಞಾನಿಗಳು ಅಭಿವೃದ್ಧಿಪಡಿಸಿರುವ ಹೊಸ ಕಲ್ಲಿದ್ದಲು ಅನಿಲೀಕರಣ ತಂತ್ರಜ್ಞಾನವು ಕಲುಷಿತ ಇಂಧನವೆಂದು ಪರಿಗಣಿಸಲ್ಪಟ್ಟ ಕಲ್ಲಿದ್ದಲಿಗೆ ಹೊಸ ಜೀವ ತುಂಬಿದೆ.

ಭಾರತದಲ್ಲಿ ಸುಮಾರು 400 ಬಿಲಿಯನ್ ಟನ್‌ಗಳಷ್ಟು ಕಲ್ಲಿದ್ದಲು ಸಂಗ್ರಹವಿದ್ದು, ಇದು ವಿಶ್ವದ ಅತಿದೊಡ್ಡ ಸಂಗ್ರಹಗಳಲ್ಲಿ ಒಂದಾಗಿದೆ. ಪ್ರಸ್ತುತ ದೇಶದ ಇಂಧನ ಬಳಕೆಯ ಸುಮಾರು 55% ಕಲ್ಲಿದ್ದಲಿನಿಂದ ಪೂರೈಕೆಯಾಗುತ್ತಿದೆ. ವಿದ್ಯುತ್ ಉತ್ಪಾದನೆಯ ಸುಮಾರು 74% ಕಲ್ಲಿದ್ದಲಿನ ಮೇಲೆ ಅವಲಂಬಿತವಾಗಿದೆ. ಆದರೆ ಕಚ್ಚಾ ತೈಲದ 83% ಮತ್ತು ನೈಸರ್ಗಿಕ ಅನಿಲದ ಸುಮಾರು 50% ಅನ್ನು ಭಾರತ ವಿದೇಶಗಳಿಂದ ಆಮದು ಮಾಡಿಕೊಳ್ಳುತ್ತಿದೆ. ಈ ಆಮದು ಅವಲಂಬನೆಯು ಜಾಗತಿಕ ರಾಜಕೀಯ ಬಿಕ್ಕಟ್ಟುಗಳು ಹಾಗೂ ಸರಬರಾಜು ಸರಪಳಿಯ ಅಡಚಣೆಗಳ ಸಂದರ್ಭಗಳಲ್ಲಿ ಭಾರತದ ಇಂಧನ ಭದ್ರತೆಗೆ ಸವಾಲಾಗಿ ಪರಿಣಮಿಸಿದೆ.

ಹೊಸ ತಂತ್ರಜ್ಞಾನದ ಮೂಲಕ ಕಲ್ಲಿದ್ದಲನ್ನು ನೇರವಾಗಿ ಸುಡುವ ಬದಲು ಅದನ್ನು ಸಿಂಥೆಸಿಸ್ ಗ್ಯಾಸ್ ಆಗಿ ಪರಿವರ್ತಿಸಲಾಗುತ್ತದೆ. ಇದರಲ್ಲಿ ಮುಖ್ಯವಾಗಿ, ಕಾರ್ಬನ್ ಮಾನಾಕ್ಸೈಡ್, ಹೈಡ್ರೋಜನ್ ಇರುತ್ತವೆ. ಈ ಅನಿಲವನ್ನು ಬಳಸಿ:‌ ಮೆಥನಾಲ್, ಅಮೋನಿಯಾ, ರಸಗೊಬ್ಬರಗಳು, ಸಿಂಥೆಟಿಕ್ ನೈಸರ್ಗಿಕ ಅನಿಲ, ಹೈಡ್ರೋಜನ್, ವಿಮಾನ ಇಂಧನ ವಿವಿಧ ರಾಸಾಯನಿಕ ಉತ್ಪನ್ನಗಳು ತಯಾರಿಸಬಹುದು.

ಕಲ್ಲಿದ್ದಲು ಅನಿಲೀಕರಣಕ್ಕೆ ಉತ್ತೇಜನ ನೀಡಲು ಕೇಂದ್ರ ಸರ್ಕಾರ ₹37,500 ಕೋಟಿ ಮೊತ್ತದ ಮಹತ್ವಾಕಾಂಕ್ಷಿ ಯೋಜನೆಗೆ ಅನುಮೋದನೆ ನೀಡಿದೆ. ಈ ಯೋಜನೆಯ ಗುರಿಗಳು: 75 ಮಿಲಿಯನ್ ಟನ್ ಕಲ್ಲಿದ್ದಲಿನ ಅನಿಲೀಕರಣ, ಕೈಗಾರಿಕಾ ಹೂಡಿಕೆಗಳಿಗೆ ಉತ್ತೇಜನ, ಆಮದು ಕಡಿತ, ದೇಶೀಯ ಉತ್ಪಾದನೆ ಹೆಚ್ಚಳ. ಇದಲ್ಲದೆ, ಈ ಕ್ಷೇತ್ರದ ಸಂಶೋಧನೆ ಮತ್ತು ಪೈಲಟ್ ಯೋಜನೆಗಳಿಗೆ ಈಗಾಗಲೇ ₹8,500 ಕೋಟಿ ಪ್ರೋತ್ಸಾಹಧನ ಯೋಜನೆಯೂ ಜಾರಿಯಲ್ಲಿದೆ.

ಭಾರತ 2070ರ ವೇಳೆಗೆ ನೆಟ್ ಜೀರೋ ಕಾರ್ಬನ್ ಉತ್ಸರ್ಜನೆ ಗುರಿ ಹೊಂದಿರುವ ನಡುವೆಯೇ, ಇಂಧನ ಭದ್ರತೆ ಮತ್ತು ಕೈಗಾರಿಕಾ ಬೆಳವಣಿಗೆಯನ್ನು ಸಮತೋಲನಗೊಳಿಸುವ ಸವಾಲು ಎದುರಿಸುತ್ತಿದೆ. ಈ ಹಿನ್ನೆಲೆಯಲ್ಲಿ ಕಲ್ಲಿದ್ದಲು ಅನಿಲೀಕರಣ: ಇಂಧನ ಸ್ವಾವಲಂಬನೆ,‌ ರಸಗೊಬ್ಬರ ಉತ್ಪಾದನೆ, ಹೈಡ್ರೋಜನ್ ಆರ್ಥಿಕತೆ,‌ ರಾಸಾಯನಿಕ ಕೈಗಾರಿಕೆ,‌ ಕೈಗಾರಿಕಾ ಕಚ್ಚಾ ವಸ್ತುಗಳ ದೇಶೀಯ ಉತ್ಪಾದನೆ, ಕ್ಷೇತ್ರಗಳಲ್ಲಿ ಮಹತ್ವದ ಪಾತ್ರ ವಹಿಸಬಹುದು ಎಂದು ತಜ್ಞರು ಅಭಿಪ್ರಾಯಪಡುತ್ತಿದ್ದಾರೆ.

ಒಮ್ಮೆ ಕಲುಷಿತ ಇಂಧನವೆಂದು ಪರಿಗಣಿಸಲ್ಪಟ್ಟ ಕಲ್ಲಿದ್ದಲು, ಇಂದು ತಂತ್ರಜ್ಞಾನದ ನೆರವಿನಿಂದ ಭಾರತದ ಇಂಧನ ಭವಿಷ್ಯದ ಪ್ರಮುಖ ಭಾಗವಾಗುವ ಸಾಧ್ಯತೆ ಹೊಂದಿದೆ. ಸವಾಲು ಕಲ್ಲಿದ್ದಲನ್ನು ತ್ಯಜಿಸುವುದಲ್ಲ; ಅದನ್ನು ಹೆಚ್ಚು ಸ್ವಚ್ಛ, ಪರಿಣಾಮಕಾರಿ ಹಾಗೂ ಪರಿಸರ ಸ್ನೇಹಿಯಾಗಿ ಬಳಸುವುದಾಗಿದೆ. ಕಪ್ಪು ಚಿನ್ನ ಎಂದು ಕರೆಯಲ್ಪಡುವ ಕಲ್ಲಿದ್ದಲು ಭಾರತದ ಇಂಧನ ಸ್ವಾವಲಂಬನೆಯ ಕನಸಿಗೆ ಹೊಸ ಶಕ್ತಿ ತುಂಬಬಹುದೇ ಎಂಬುದನ್ನು ಮುಂದಿನ ವರ್ಷಗಳು ನಿರ್ಧರಿಸಲಿವೆ.

Technology: The work of breathing new life into the black gold known as Kallidalli –  ತುಳು ಟೈಮ್ಸ್

ಇದನ್ನೂ ಓದಿ : ಆರೋಗ್ಯ ಸಚಿವ ಯು.ಟಿ. ಖಾದರ್‌ರಿಂದ ಜಯನಗರ ಆಸ್ಪತ್ರೆ ಪರಿಶೀಲನೆ

=====

ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ : https://www.youtube.com/live/xI868u7lWtY?si=jDB8wzyX_BTDnllb