ಸತ್ತ ಮಗಳಿಗಿಂತ ವಿಚ್ಛೇದಿತ ಮಗಳು ಉತ್ತಮ: ಟ್ವಿಶಾ ಶರ್ಮಾ ಪ್ರಕರಣ ಸಮಾಜಕ್ಕೆ ನೀಡಿದ ಕಠಿಣ ಸಂದೇಶ

ನವದೆಹಲಿ : Tulu Times l ನಟಿ ಹಾಗೂ ಮಾಜಿ ಮಾಡೆಲ್ ಟ್ವಿಶಾ ಶರ್ಮಾ ಸಾವಿನ ಪ್ರಕರಣ ಎಲ್ಲರಲ್ಲಿ ಆಘಾತಕಾರಿ ಘಟನೆಯಾಗಿ ಉಳಿದಿದೆ. ಕೇವಲ ಒಂದು ಕುಟುಂಬದ ದುರಂತವಾಗಿ ಉಳಿಯದೆ, ಇದು ಮಹಿಳಾ ಸುರಕ್ಷತೆ, ವೈವಾಹಿಕ ಒತ್ತಡ, ವರದಕ್ಷಿಣೆ ಕಿರುಕುಳ ಮತ್ತು ಸಮಾಜದ ಮೌಲ್ಯಗಳ ಕುರಿತು ರಾಷ್ಟ್ರವ್ಯಾಪಿ ಚರ್ಚೆಗೆ ಕಾರಣವಾಗಿದೆ. ಈ ಪ್ರಕರಣದ ವಿಚಾರಣೆ ವೇಳೆ ಮಧ್ಯಪ್ರದೇಶ ಸರ್ಕಾರದ ಪರ ವಾದ ಮಂಡಿಸಿದ ಸಾಲಿಸಿಟರ್ ಜನರಲ್ ತುಶಾರ್ ಮೆಹ್ತಾ ಹೇಳಿದ ಒಂದು ವಾಕ್ಯ ದೇಶದ ಗಮನ ಸೆಳೆಯಿತು. ಅದೇನೆಂದರೆ, ಸತ್ತ ಮಗಳಿಗಿಂತ ವಿಚ್ಛೇದಿತ ಮಗಳು ಉತ್ತಮ.
ಈ ಮಾತು ಕೇವಲ ಕಾನೂನು ವಾದವಾಗಿರಲಿಲ್ಲ; ಅದು ಇಂದಿನ ಸಮಾಜಕ್ಕೆ ನೀಡಿದ ಗಂಭೀರ ಎಚ್ಚರಿಕೆಯೂ ಆಗಿತ್ತು.

ಭಾರತೀಯ ಸಮಾಜದಲ್ಲಿ ಮದುವೆಯನ್ನು ಪವಿತ್ರ ಬಂಧ ಎಂದು ಕಾಣಲಾಗುತ್ತದೆ. ಆದರೆ ಅನೇಕ ಬಾರಿ ಮಹಿಳೆಯರು ಕುಟುಂಬದ ಮಾನ, ಸಮಾಜದ ಭಯ ಅಥವಾ ಜನರು ಏನು ಹೇಳುತ್ತಾರೆ? ಎಂಬ ಒತ್ತಡದಿಂದ ಕಿರುಕುಳವನ್ನು ಸಹಿಸಿಕೊಂಡೇ ಬದುಕುತ್ತಾರೆ. ಮಾನಸಿಕ ಹಿಂಸೆ, ಆರ್ಥಿಕ ಒತ್ತಡ, ಅವಮಾನ, ವರದಕ್ಷಿಣೆ ಕಿರುಕುಳ ಇವುಗಳನ್ನು ಸಹಿಸುವುದೇ ಒಳ್ಳೆಯ ಹೆಂಡತಿಯ ಲಕ್ಷಣ ಎಂಬ ತಪ್ಪು ಕಲ್ಪನೆ ಇನ್ನೂ ಕೆಲವಡೆ ಜೀವಂತವಾಗಿದೆ.

33 ವರ್ಷದ ಟ್ವಿಶಾ ಶರ್ಮಾ ತನ್ನ ಪತಿಯ ಮನೆಯಲ್ಲಿ ಮೃತ ಸ್ಥಿತಿಯಲ್ಲಿ ಪತ್ತೆಯಾಗಿದ್ದು ದೇಶದಾದ್ಯಂತ ಆಘಾತ ಮೂಡಿಸಿತು. ಕುಟುಂಬದವರು ವರದಕ್ಷಿಣೆ ಕಿರುಕುಳ ಮತ್ತು ಮಾನಸಿಕ ಹಿಂಸೆ ಆರೋಪಿಸಿದರೆ, ಪ್ರತಿಪಕ್ಷವು ಬೇರೆ ವಾದ ಮುಂದಿಟ್ಟಿದೆ. ಆದರೆ ಈ ಪ್ರಕರಣದಲ್ಲಿ ಜನರನ್ನು ಹೆಚ್ಚು ಕಳವಳಗೊಳಿಸಿದ ಸಂಗತಿ ತನಿಖೆಯ ಬಗ್ಗೆ ಮೂಡಿದ ಅನುಮಾನಗಳು. ಆರೋಪಿಗಳ ಕುಟುಂಬದ ಹಿನ್ನೆಲೆ ಮತ್ತು ಸಾಕ್ಷ್ಯಗಳ ಕುರಿತ ಪ್ರಶ್ನೆಗಳು ನ್ಯಾಯಾಂಗದ ಮೇಲೆಯೂ ಸಾರ್ವಜನಿಕ ಚರ್ಚೆ ಹುಟ್ಟುಹಾಕಿದವು. ಇದೇ ಕಾರಣಕ್ಕೆ ಸುಪ್ರೀಂ ಕೋರ್ಟ್ ಸ್ವತಃ ಪ್ರಕರಣದತ್ತ ಗಮನ ಹರಿಸಿದೆ. ಅನೇಕ ಮಹಿಳೆಯರು ಕಿರುಕುಳ ಅನುಭವಿಸಿದರೂ ತಮ್ಮ ನೋವನ್ನು ಮನೆಯವರಿಗೂ ಹೇಳುವುದಿಲ್ಲ. ಕೆಲವರು ಹೇಳಿದರೂ ಸ್ವಲ್ಪ ಸಹಿಸು, ಎಲ್ಲ ಮನೆಗಳಲ್ಲೂ ಹೀಗೇ ಇರುತ್ತದೆ‌ ಎಂಬ ಉತ್ತರವೇ ಸಿಗುತ್ತದೆ.‌ ಆದರೆ ಕುಟುಂಬಗಳು ತಮ್ಮ ಮಗಳಿಗೆ: ಮಾನಸಿಕ ಬೆಂಬಲ,‌ಕಾನೂನು ಅರಿವು,‌ಸುರಕ್ಷಿತ ನಿರ್ಧಾರ ತೆಗೆದುಕೊಳ್ಳುವ ಧೈರ್ಯ ನೀಡಬೇಕಾದ ಅಗತ್ಯ ಹೆಚ್ಚಾಗಿದೆ.

ಟ್ವಿಶಾ ಶರ್ಮಾ ಪ್ರಕರಣದಲ್ಲಿ ಸತ್ಯ ಏನು ಎಂಬುದು ತನಿಖೆಯ ನಂತರ ಸ್ಪಷ್ಟವಾಗಲಿದೆ. ಆದರೆ ಈ ಘಟನೆ ಸಮಾಜಕ್ಕೆ ಒಂದು ಮಹತ್ವದ ಪಾಠ ಕಲಿಸಿದೆ. ಮಹಿಳೆಯರು ಕೇವಲ ಕುಟುಂಬದ ಗೌರವಕ್ಕಾಗಿ ತಮ್ಮ ಜೀವನವನ್ನು ತ್ಯಾಗ ಮಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಬಾರದು. ಮದುವೆ ಸಂತೋಷ, ಗೌರವ ಮತ್ತು ಭದ್ರತೆಯ ಸ್ಥಳವಾಗಿರಬೇಕು; ಭಯ ಮತ್ತು ಹಿಂಸೆಯ ಸ್ಥಳವಾಗಬಾರದು.‌ ಸತ್ತ ಮಗಳಿಗಿಂತ ವಿಚ್ಛೇದಿತ ಮಗಳು ಉತ್ತಮ ಎಂಬ ಮಾತು ಕೆಲವರಿಗೆ ಕಠಿಣವಾಗಿ ಕೇಳಿಸಬಹುದು. ಆದರೆ ಅದರೊಳಗೆ ಒಂದು ದೊಡ್ಡ ಸಾಮಾಜಿಕ ಸತ್ಯ ಅಡಗಿದೆ. ಜೀವನ ಯಾವ ಸಂಬಂಧಕ್ಕಿಂತ ದೊಡ್ಡದು. ಮಹಿಳೆಯರ ಸುರಕ್ಷತೆ, ಮಾನಸಿಕ ಆರೋಗ್ಯ ಮತ್ತು ಆತ್ಮಗೌರವವನ್ನು ಸಮಾಜ ಮೊದಲ ಆದ್ಯತೆಯಾಗಿ ನೋಡಬೇಕಾದ ಸಮಯ ಈಗ ಬಂದಿದೆ.

A divorced daughter is better than a dead one: Twisha Sharma’s case sends a strong message to society – ತುಳು ಟೈಮ್ಸ್

ಇದನ್ನೂ ಓದಿ :ಸುಬ್ರಹ್ಮಣ್ಯ, ಧರ್ಮಸ್ಥಳ ಮತ್ತು ಸೌತಡ್ಕ ಕ್ಷೇತ್ರಗಳಲ್ಲಿ ಜನಸಾಗರ

====

ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ :https://www.youtube.com/live/4pEuD7fDOuo?si=NM0tBe15Cbzi85Bp