ಕರ್ನಾಟಕ : Tulu Times l ಡಿಜಿಟಲ್ ಯುಗದಲ್ಲಿ ಮಕ್ಕಳ ಜೀವನದಲ್ಲಿ ಮೊಬೈಲ್ ಮತ್ತು ಇಂಟರ್ನೆಟ್ ಪ್ರಮುಖ ಪಾತ್ರವಹಿಸುತ್ತಿದ್ದರೂ, ಅದರ ಅತಿಯಾದ ಬಳಕೆ ಆರೋಗ್ಯ ಮತ್ತು ಮನೋವೈಕಲ್ಯ ಸಮಸ್ಯೆಗಳಿಗೆ ಕಾರಣವಾಗುತ್ತಿದೆ. ಈ ಹಿನ್ನೆಲೆದಲ್ಲಿ ಕರ್ನಾಟಕ ಸರ್ಕಾರ ಮಕ್ಕಳ ಡಿಜಿಟಲ್ ಬಳಕೆಯನ್ನು ನಿಯಂತ್ರಿಸಲು ಮಹತ್ವದ ‘ಡಿಜಿಟಲ್ ವೆಲ್ಬೀಯಿಂಗ್’ ಕರಡು ನೀತಿಯನ್ನು ರೂಪಿಸಿದೆ.
ಈ ಹೊಸ ನೀತಿಯ ಪ್ರಮುಖ ಉದ್ದೇಶ ಮಕ್ಕಳಲ್ಲಿ ಆರೋಗ್ಯಕರ ಡಿಜಿಟಲ್ ಅಭ್ಯಾಸಗಳನ್ನು ಬೆಳೆಸುವುದು. ಅದಕ್ಕಾಗಿ ಹಲವು ಕಠಿಣ ಕ್ರಮಗಳನ್ನು ಸೂಚಿಸಲಾಗಿದೆ. ಪ್ರಮುಖವಾಗಿ, ಮಕ್ಕಳ ಸ್ಕ್ರೀನ್ ಸಮಯವನ್ನು ದಿನಕ್ಕೆ ಕೇವಲ ಒಂದು ಗಂಟೆಗೆ ಸೀಮಿತಗೊಳಿಸುವ ಪ್ರಸ್ತಾವನೆ ಮಾಡಲಾಗಿದೆ. ಜೊತೆಗೆ ಸಂಜೆ 7 ಗಂಟೆಯ ನಂತರ ಇಂಟರ್ನೆಟ್ ಬಳಕೆಯನ್ನು ಸಂಪೂರ್ಣವಾಗಿ ನಿಲ್ಲಿಸುವಂತೆ ನಿಯಮ ತರಲು ಯೋಜಿಸಲಾಗಿದೆ.
ಈ ಕರಡು ನೀತಿಯನ್ನು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ, ಕರ್ನಾಟಕ ರಾಜ್ಯ ಮಾನಸಿಕ ಆರೋಗ್ಯ ಪ್ರಾಧಿಕಾರ ಮತ್ತು ರಾಷ್ಟ್ರೀಯ ಮಾನಸಿಕ ಆರೋಗ್ಯ ಮತ್ತು ನರ ವಿಜ್ಞಾನ ಸಂಸ್ಥೆ ಸಹಯೋಗದಲ್ಲಿ ಸಿದ್ಧಪಡಿಸಲಾಗಿದೆ. ಇದು ಸ್ಕ್ರೀನ್ ವ್ಯಸನವನ್ನು ಕೇವಲ ಅಭ್ಯಾಸ ಸಮಸ್ಯೆಯಾಗಿ ನೋಡದೆ, ಸಾರ್ವಜನಿಕ ಆರೋಗ್ಯ ಸಮಸ್ಯೆಯಾಗಿ ಪರಿಗಣಿಸಿದೆ.
ಮಕ್ಕಳಿಗೆ ‘ಚೈಲ್ಡ್ ಪ್ಲಾನ್’ ಎನ್ನುವ ನಿಯಂತ್ರಿತ ಡಿಜಿಟಲ್ ಸೇವೆಗಳನ್ನು ಮಾತ್ರ ನೀಡಲು ಸಲಹೆ ನೀಡಲಾಗಿದೆ. ಕೆಲವೊಂದು ಸಂದರ್ಭಗಳಲ್ಲಿ ಕೇವಲ ಆಡಿಯೋ ಫೋನ್ಗಳ ಬಳಕೆಯನ್ನೂ ಪರಿಗಣಿಸಲಾಗಿದೆ. ವಯಸ್ಸಿನ ಆಧಾರದ ಮೇಲೆ ಸಾಧನಗಳ ಬಳಕೆಯನ್ನು ನಿಯಂತ್ರಿಸುವ ವ್ಯವಸ್ಥೆಯನ್ನೂ ಪರಿಚಯಿಸುವ ಉದ್ದೇಶವಿದೆ. ಶಾಲೆಗಳ ಪಾತ್ರ ಈ ನೀತಿಯಲ್ಲಿ ಅತ್ಯಂತ ಪ್ರಮುಖವಾಗಿದೆ. ಪಠ್ಯಕ್ರಮದಲ್ಲಿ ಡಿಜಿಟಲ್ ವೆಲ್ಬೀಯಿಂಗ್ ವಿಷಯವನ್ನು ಸೇರಿಸಿ, ಆನ್ಲೈನ್ ಸುರಕ್ಷತೆ, ಗೌಪ್ಯತೆ ಮತ್ತು ಜವಾಬ್ದಾರಿಯುತ ಬಳಕೆಯ ಬಗ್ಗೆ ಮಕ್ಕಳಿಗೆ ಅರಿವು ಮೂಡಿಸಲಾಗುತ್ತದೆ. ಜೊತೆಗೆ ಶಾಲೆಗಳಲ್ಲಿ “ಡಿಜಿಟಲ್ ಸೇಫ್ಟಿ ಮತ್ತು ವೆಲ್ನೆಸ್ ಸಮಿತಿಗಳು” ರಚಿಸಿ, ಶಿಕ್ಷಕರು, ಪೋಷಕರು, ವಿದ್ಯಾರ್ಥಿಗಳು ಮತ್ತು ಸೈಬರ್ ಪೊಲೀಸ್ ಅಧಿಕಾರಿಗಳನ್ನು ಒಳಗೊಂಡಂತೆ ಕಾರ್ಯನಿರ್ವಹಿಸುವ ಯೋಜನೆಯೂ ಇದೆ.
ಇದಲ್ಲದೆ, ಶಾಲೆಗಳಲ್ಲಿ ‘ಡಿಜಿಟಲ್ ಡಿಟಾಕ್ಸ್ ವೀಕ್’ ಅಥವಾ ‘ನೋ ಟೆಕ್ ಡೇ’ಗಳನ್ನು ಆಚರಿಸಿ, ಮಕ್ಕಳನ್ನು ಆಫ್ಲೈನ್ ಚಟುವಟಿಕೆಗಳತ್ತ ಪ್ರೋತ್ಸಾಹಿಸಲು ಯೋಜಿಸಲಾಗಿದೆ. ವಾಟ್ಸಾಪ್ ಮೂಲಕ ಸಂವಹನ ಕಡಿಮೆ ಮಾಡಿ, ಹಳೆಯ ಡೈರಿ ವ್ಯವಸ್ಥೆಗೆ ಮರಳುವ ಸಲಹೆಯೂ ನೀಡಲಾಗಿದೆ.
ಕುಟುಂಬಗಳಿಗೂ ಈ ನೀತಿ ಕೆಲವು ಮಾರ್ಗಸೂಚಿಗಳನ್ನು ನೀಡುತ್ತದೆ. ‘ಡಿಜಿಟಲ್ ಫಾಸ್ಟಿಂಗ್’ ಮೂಲಕ ನಿರ್ದಿಷ್ಟ ಸಮಯದಲ್ಲಿ ಎಲ್ಲಾ ಸದಸ್ಯರು ಮೊಬೈಲ್ ಬಳಕೆಯಿಂದ ದೂರವಿರುವ ಅಭ್ಯಾಸ ಬೆಳೆಸಿಕೊಳ್ಳಬೇಕು ಎಂದು ಸೂಚಿಸಲಾಗಿದೆ. ಒಟ್ಟಿನಲ್ಲಿ, ಈ ಡಿಜಿಟಲ್ ಡಿಟಾಕ್ಸ್ ನೀತಿ ಮಕ್ಕಳ ಭವಿಷ್ಯವನ್ನು ಆರೋಗ್ಯಕರ ದಿಕ್ಕಿನಲ್ಲಿ ಮುನ್ನಡೆಸುವ ಮಹತ್ವದ ಹೆಜ್ಜೆಯಾಗಿದೆ. ತಂತ್ರಜ್ಞಾನವನ್ನು ಸಂಪೂರ್ಣವಾಗಿ ತಳ್ಳಿಹಾಕುವುದಕ್ಕಿಂತ, ಅದನ್ನು ಸಮತೋಲನದಿಂದ ಬಳಸುವ ಕಲೆಯನ್ನು ಮಕ್ಕಳಿಗೆ ಕಲಿಸುವುದು ಈ ನೀತಿಯ ಮುಖ್ಯ ಗುರಿಯಾಗಿದೆ.
A regulated digital service called ‘Child Plan’ for children – ತುಳುಟೈಮ್ಸ್
ಇದನ್ನೂ ಓದಿ : ಐಪಿಎಲ್ 2026 : ಹೊಸ ಸಹಭಾಗಿತ್ವದಲ್ಲಿ ಜೊತೆಯಾದ ನಂದಿನಿ ಬ್ರ್ಯಾಂಡ್
===
ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ :https://www.youtube.com/live/zCHeK3yD0ds?si=y_3UbeC2UJtIpB7h
