ರಷ್ಯಾ ಕಚ್ಚಾ ತೈಲ ನಿಷೇಧದ ಪರಿಣಾಮ : ಯುರೋಪ್ ಬದಲು ಪಶ್ಚಿಮ ಆಫ್ರಿಕಾಗೆ ಭಾರತದ ಡೀಸೆಲ್ ರಫ್ತು ಹೆಚ್ಚಳ

ಮುಂಬೈ : Tulu Times | ರಷ್ಯಾದ ಕಚ್ಚಾ ತೈಲದಿಂದ ಸಂಸ್ಕರಿಸಿದ ಇಂಧನದ ಮೇಲೆ ಯುರೋಪಿಯನ್ ಯೂನಿಯನ್ (EU) ನಿಷೇಧ ಹೇರಿದ ಹಿನ್ನೆಲೆ, ಭಾರತವು ಈ ತಿಂಗಳಿಂದ ತನ್ನ ಡೀಸೆಲ್ ರಫ್ತನ್ನು ಯುರೋಪ್‌ನಿಂದ ಪಶ್ಚಿಮ ಆಫ್ರಿಕಾಗೆ ತಿರುಗಿಸಿದೆ. ಕಪ್ಲರ್ (Kpler) ಮತ್ತು ವೋರ್ಟೆಕ್ಸಾ (Vortexa) ಸಂಸ್ಥೆಗಳ ಸಾಗಣೆ ದತ್ತಾಂಶಗಳು ಇದನ್ನು ದೃಢಪಡಿಸಿವೆ.

ಜನವರಿಯಲ್ಲಿ ಸುಮಾರು 45,000 ಬ್ಯಾರೆಲ್‌ಗೆ ಇಳಿಕೆ ;

2022ರಲ್ಲಿ ಉಕ್ರೇನ್ ಮೇಲೆ ರಷ್ಯಾ ದಾಳಿ ನಡೆಸಿದ ಹಿನ್ನೆಲೆಯಲ್ಲಿ ಮಸ್ಕೋಗೆ ಆರ್ಥಿಕ ಒತ್ತಡ ಹೇರುವ ಉದ್ದೇಶದಿಂದ EU ಈ ನೀತಿಯನ್ನು ಜಾರಿಗೆ ತಂದಿದೆ. ಇದರ ಪರಿಣಾಮವಾಗಿ ಜಾಗತಿಕ ತೈಲ ವಹಿವಾಟು ಮಾರ್ಗಗಳಲ್ಲಿ ಮಹತ್ವದ ಬದಲಾವಣೆ ಕಂಡುಬಂದಿದೆ ಎಂದು ವಿಶ್ಲೇಷಕರು ತಿಳಿಸಿದ್ದಾರೆ. ಯುರೋಪಿನ ಮಾರುಕಟ್ಟೆ ಮುಚ್ಚಿದ ಕಾರಣ ಭಾರತೀಯ ರಿಫೈನರಿಗಳು ಹೊಸ ಮಾರುಕಟ್ಟೆಗಳ ಹುಡುಕಾಟಕ್ಕೆ ಮುಂದಾಗಿದ್ದು, ಪಶ್ಚಿಮ ಆಫ್ರಿಕಾ ಪ್ರಮುಖ ಗಮ್ಯಸ್ಥಾನವಾಗಿ ಪರಿಣಮಿಸಿದೆ. ಇದರಿಂದ ಮಧ್ಯಪ್ರಾಚ್ಯದ ಇಂಧನ ಯುರೋಪಿನ ಬಳಕೆಗೆ ಹೆಚ್ಚು ಲಭ್ಯವಾಗುತ್ತಿದೆ. 2025ರಲ್ಲಿ ಭಾರತ ದಿನಕ್ಕೆ ಸರಾಸರಿ 1.37 ಲಕ್ಷ ಬ್ಯಾರೆಲ್ ಡೀಸೆಲ್ ಅನ್ನು ಯುರೋಪಿಯನ್ ಯೂನಿಯನ್‌ಗೆ ರಫ್ತು ಮಾಡಿದ್ದು, ಯುರೋಪ್‌ಗೆ ಮೂರನೇ ಅತಿದೊಡ್ಡ ಪೂರೈಕೆದಾರ ರಾಷ್ಟ್ರವಾಗಿತ್ತು. ಭಾರತದ ಸಮುದ್ರಮಾರ್ಗದ ಕಚ್ಚಾ ತೈಲ ಆಮದುಗಳಲ್ಲಿ ಶೇಕಡಾ 30ರಷ್ಟು ರಷ್ಯಾದಿಂದಲೇ ಆಗುತ್ತಿತ್ತು. ಟರ್ಕಿ ತನ್ನ ಆಮದುಗಳಲ್ಲಿ ಶೇಕಡಾ 48ರಷ್ಟು ರಷ್ಯಾದ ಮೇಲೆ ಅವಲಂಬಿತವಾಗಿತ್ತು. ಇದರ ಪರಿಣಾಮವಾಗಿ, ಟರ್ಕಿಯಿಂದ ಯುರೋಪಿಗೆ ಹೋಗುತ್ತಿದ್ದ ಡೀಸೆಲ್ ರಫ್ತು ಗಣನೀಯವಾಗಿ ಕುಸಿದು, 2025ರಲ್ಲಿ ತಿಂಗಳಿಗೆ ಸರಾಸರಿ 87,000 ಬ್ಯಾರೆಲ್ ಇದ್ದದ್ದು, ಈ ವರ್ಷದ ಜನವರಿಯಲ್ಲಿ ಸುಮಾರು 45,000 ಬ್ಯಾರೆಲ್‌ಗೆ ಇಳಿಕೆಯಾಗಿದೆ.

ಇದರ ನಡುವೆಯೇ, ಪಶ್ಚಿಮ ಆಫ್ರಿಕಾಗೆ ಭಾರತದ ಡೀಸೆಲ್ ರಫ್ತು ಡಿಸೆಂಬರ್‌ನಲ್ಲಿ ದಿನಕ್ಕೆ ಸುಮಾರು 1.55 ಲಕ್ಷ ಬ್ಯಾರೆಲ್ ಎಂಬ ದಾಖಲೆ ಮಟ್ಟ ತಲುಪಿದ್ದು, ಜನವರಿಯಲ್ಲಿ ಸುಮಾರು 84,000 ಬ್ಯಾರೆಲ್ ಆಗಿದೆ. ಇತ್ತ ಯುರೋಪಿನ ದೇಶಗಳು ರಷ್ಯಾದ ಇಂಧನ ನಿಷೇಧಕ್ಕೆ ಮುನ್ನ ತಯಾರಿ ನಡೆಸುವ ಸಲುವಾಗಿ ಅಮೆರಿಕಾ ಮತ್ತು ಮಧ್ಯಪ್ರಾಚ್ಯದಿಂದ ಇಂಧನ ಆಮದು ಹೆಚ್ಚಿಸಿಕೊಳ್ಳುತ್ತಿವೆ. ಈ ಬದಲಾವಣೆಗಳ ಪರಿಣಾಮ ಮಾರುಕಟ್ಟೆಯಲ್ಲೂ ಸ್ಪಷ್ಟವಾಗಿ ಗೋಚರಿಸಿದ್ದು, ಬುಧವಾರ ನಿಫ್ಟಿ ಆಯಿಲ್ ಮತ್ತು ಗ್ಯಾಸ್ ಸೂಚ್ಯಂಕವು 3.4 ಶೇಕಡಾ ಏರಿಕೆ ಕಂಡಿದೆ. ಅದೇ ವೇಳೆ ಬ್ರೆಂಟ್ ಕಚ್ಚಾ ತೈಲದ ಭವಿಷ್ಯ ವಹಿವಾಟು ಪ್ರತಿ ಬ್ಯಾರೆಲ್‌ಗೆ 66.50 ರಿಂದ 67.50 ಡಾಲರ್‌ಗಳ ನಡುವೆ ವಹಿವಾಟು ಕಂಡಿದ್ದು, ಈ ಮಟ್ಟವನ್ನು ಕೊನೆಯದಾಗಿ ಅಕ್ಟೋಬರ್‌ನಲ್ಲಿ ನೋಡಲಾಗಿತ್ತು.

Impact of Russian crude oil ban: India’s diesel exports increase to West Africa instead of Europe- ತುಳು ಟೈಮ್ಸ್

ಇದನ್ನೂ ಓದಿ : ಫೆ.3ರಂದು ಕಸ್ತೂರಬಾ ಆಸ್ಪತ್ರೆ ಮಣಿಪಾಲದಲ್ಲಿ ಲಿವರ್ ಮತ್ತು ಟ್ರಾನ್ಸ್‌ಪ್ಲಾಂಟ್ ಕ್ಲಿನಿಕ್

========

ವೀಡಿಯೋ ಸುದ್ದಿಗಳಿಗಾಗಿ ನಮ್ಮ ಯೂಟ್ಯೂಬ್ ಲಿಂಕ್ ಕ್ಲಿಕ್ ಮಾಡಿ : https://youtu.be/yx1fqcpWfnc?si=hpij495tpOn7uys6