ವಾಷಿಂಗ್ಟನ್ : Tulu Times | ಅಮೆರಿಕ ತನ್ನ ಸ್ವಾತಂತ್ರ್ಯದ 250ನೇ ವರ್ಷದ ಸಂಭ್ರಮವನ್ನು 2026ರಲ್ಲಿ ಆಚರಿಸಲು ಸಜ್ಜಾಗುತ್ತಿರುವ ಹಿನ್ನೆಲೆಯಲ್ಲಿ, ನಾಸಾದ ಆರ್ಟೆಮಿಸ್–2 (Artemis II) ಮಿಷನ್ ಚಂದ್ರನ ಕಕ್ಷೆಗೆ ಹಲವು ಐತಿಹಾಸಿಕ ಸ್ಮಾರಕ ವಸ್ತುಗಳನ್ನು ಕೊಂಡೊಯ್ಯಲಿದೆ.
ನಾಸಾ ದೃಢಪಡಿಸಿರುವಂತೆ, ಓರಿಯನ್ (Orion) ಬಾಹ್ಯಾಕಾಶ ನೌಕೆಯಲ್ಲಿರುವ ಅಧಿಕೃತ ಫ್ಲೈಟ್ ಕಿಟ್ ನಲ್ಲಿ ಅಮೆರಿಕ ಹಾಗೂ ಜಾಗತಿಕ ಬಾಹ್ಯಾಕಾಶ ಇತಿಹಾಸದ ಪ್ರಮುಖ ಕ್ಷಣಗಳನ್ನು ಪ್ರತಿನಿಧಿಸುವ ವಸ್ತುಗಳು ಸೇರಲಿವೆ. ನಾಸಾ ಮತ್ತು ಅದರ ಅಂತರರಾಷ್ಟ್ರೀಯ ಸಹಭಾಗಿಗಳಿಂದ ಆಯ್ಕೆ ಮಾಡಲಾದ ಈ ವಸ್ತುಗಳು, ವಿಶ್ವದ ಮೊದಲ ಮಾನವಸಹಿತ ಆರ್ಟೆಮಿಸ್ ಯಾನದಲ್ಲಿ ಪ್ರಯಾಣ ಮಾಡಲಿವೆ.
ಪ್ರಮುಖ ವಸ್ತುಗಳು
1903ರ ರೈಟ್ ಫ್ಲೈಯರ್ ವಿಮಾನದ ಮಸ್ಲಿನ್ ಬಟ್ಟೆಯ ತುಂಡು (ಸ್ಮಿತ್ಸೋನಿಯನ್ ನ್ಯಾಷನಲ್ ಏರ್ ಅಂಡ್ ಸ್ಪೇಸ್ ಮ್ಯೂಸಿಯಂ), ಮೊದಲ ಹಾಗೂ ಕೊನೆಯ ಸ್ಪೇಸ್ ಶಟಲ್ ಮಿಷನ್ನಲ್ಲಿ ಹಾರಿದ ಅಮೆರಿಕದ ಧ್ವಜ, ಅಪೋಲೊ–18 ಮಿಷನ್ ಧ್ವಜ ನಾಸಾದ ಜೆಟ್ ಪ್ರೊಪಲ್ಷನ್ ಲ್ಯಾಬೊರೇಟರಿಯಿಂದ ನೀಡಲಾದ ಚಂದ್ರನ ಮೇಲ್ಮೈ ತಲುಪಿದ ಮೊದಲ ಅಮೆರಿಕನ್ ಯಾನವಾದ ರೇಂಜರ್–7 ನ 4×5 ಇಂಚಿನ ಫೋಟೋ ನೆಗೆಟಿವ್
ಇವುಗಳನ್ನು ಒಳಗೊಂಡಿರುತ್ತವೆ.
ಅಂತರರಾಷ್ಟ್ರೀಯ ಸಹಕಾರದ ಸಂಕೇತ
ಆರ್ಟೆಮಿಸ್–2 ಫ್ಲೈಟ್ ಕಿಟ್ನಲ್ಲಿ ಅಂತರರಾಷ್ಟ್ರೀಯ ಸಹಕಾರವೂ ಸ್ಪಷ್ಟವಾಗಿ ಪ್ರತಿಬಿಂಬಿಸುತ್ತದೆ. ಆರ್ಟೆಮಿಸ್–1 ಮಿಷನ್ನಲ್ಲಿ ಹಾರಿಸಿದ ಬೀಜಗಳಿಂದ ಬೆಳೆದ “ಮೂನ್ ಟ್ರೀಸ್” (ಚಂದ್ರ ಮರಗಳು) ಗಳ ಮಣ್ಣು, ಕೆನಡಾ ಬಾಹ್ಯಾಕಾಶ ಸಂಸ್ಥೆಯಿಂದ ನೀಡಲಾದ ಬೀಜಗಳು, ಕೆನಡಾ ಹಾಗೂ ಯುರೋಪಿಯನ್ ಬಾಹ್ಯಾಕಾಶ ಸಂಸ್ಥೆಗಳ ಮಿಷನ್ ಪ್ಯಾಚ್ಗಳು, ಪಿನ್ಗಳು ಮತ್ತು ಧ್ವಜಗಳು ಇವುಗಳನ್ನೂ ಸೇರಿಸಲಾಗಿದೆ. ಇದಲ್ಲದೆ, ನಾಸಾದ “ಸೆಂಡ್ ಯೂರ್ ನೇಮ್” ಅಭಿಯಾನದ ಮೂಲಕ ಸಾರ್ವಜನಿಕರು ಸಲ್ಲಿಸಿದ ಹೆಸರುಗಳನ್ನು ಒಳಗೊಂಡ ಎಸ್ಡಿ ಕಾರ್ಡ್ ಅನ್ನು ಕೂಡ ಕೊಂಡೊಯ್ಯಲಾಗುತ್ತಿದೆ. ಇದು ಜಾಗತಿಕ ಜನರ ಪಾಲ್ಗೊಳ್ಳುವಿಕೆಯನ್ನು ಸಂಕೇತಿಸುತ್ತದೆ ಎಂದು ನಾಸಾ ತಿಳಿಸಿದೆ.
ಪೂರ್ಣ ಫ್ಲೈಟ್ ಪ್ಯಾಕೇಜ್ನ ತೂಕ ಸುಮಾರು 10 ಪೌಂಡ್ಗಳು (ಸುಮಾರು 4.5 ಕೆಜಿ) ಎಂದು ಹೇಳಲಾಗಿದೆ. ಆರ್ಟೆಮಿಸ್–2 ನಾಸಾದ ಆರ್ಟೆಮಿಸ್ ಕಾರ್ಯಕ್ರಮದಡಿ ನಡೆಯುವ ಮೊದಲ ಮಾನವಸಹಿತ ಮಿಷನ್ ಆಗಿದ್ದು, ಮಾನವರನ್ನು ಮತ್ತೆ ಚಂದ್ರನಿಗೆ ಕಳುಹಿಸುವ ಮಹತ್ವದ ಹೆಜ್ಜೆಯಾಗಿದೆ. ಇದರ ಮೂಲಕ ಮುಂದಿನ ದಿನಗಳಲ್ಲಿ ಚಂದ್ರನ ಮೇಲಿನ ದೀರ್ಘಕಾಲೀನ ಸಂಶೋಧನೆ ಮತ್ತು ಮಂಗಳ ಗ್ರಹದಂತಹ ಇನ್ನಷ್ಟು ದೂರದ ಗುರಿಗಳತ್ತ ಸಾಗಲು ಸಹಕಾರಿಯಾಗಲಿದೆ ಎಂದು ನಾಸಾ ತಿಳಿಸಿದೆ.
NASA will take historical objects to the moon! – ತುಳುಟೈಮ್ಸ್
ಇದನ್ನೂ ಓದಿ : ನಂದಿನಿ ಹಾಲು, ಮೊಸರು ಈಗ ರೂ. 10ಕ್ಕೆ ಲಭ್ಯ ; ಹೊಸ ಉತ್ಪನ್ನಗಳ ಬಿಡುಗಡೆ
